كتب- محمد عمارة:

قالت الفنانة القديرة لبلبة، إنها سعيدة بالتكريم الذي حصلت عليه من وزير التربية والتعليم عن دورها في مسلسل دايما عامر.

وأضافت لمصراوي، الأربعاء: ده تاني تكريم لي.. من شهرين اتكرمت من نيفين القباج وزيرة التضامن عن نفس الدور، ده دور تربوي، بتكلم ضد التنمر والطلاق اللي بيحصل، والولاد بيعانوا من ده، أنا مليش دعوة مين يقدم طلب إحاطة في البرلمان على تكريمي، أنا أتقنت دوري.. الدور مكتوب كويس أوي، أنا أفنيت حياتي كلها للفن.

وأوضحت الفناة القديرة: عايزة في يوم لو فارقت الحياة ومشيت أكون سايبة حاجات زي دي، وأنا بعتز بتاريخي كله.

وتابعت لبلبة: عندي مشهد في المسلسل ده، أنا بكيت فيه، وهو مشهد لأم طالب سلوكه كان وحش، حكت لي إنها اتطلقت وهي تزوجت وطليقها تزوج، والولد اتشحطط ومكنش معاه لا أم ولا أب، عشان كده قلت لازم قبل الطلاق تفكروا في الأولاد.

وأكملت: لو حصل إني اعتزلت الفن أو فارقت الحياة ده دور مهم وبعتز به، مسائل الطلاق زادت جدا وبينعكس على الأولاد.

وقالت لبلبة: أنا عملت 28 أغنية للأطفال، تفرغت 3 سنين للطفل، عملت مع عمار الشريعي وسيد حجاب أغاني كتير، وعملت أوبريت تعليم الأطفال الحروف من إخراج فهمي عبدالحميد، وعملت مسرحية لهم، تكريمي تشجيع على دور مهم وتربوي.

وأكملت: راضعة الفن لحد ما أنا قادرة أقف أنا بتاعة الناس.

وكرم وزير التربية والتعليم النجمة لبلبة في قاعة سيد درويش عن دورها في مسلسل دايما عامر، الذى قدمته فيه نموذجا مثاليا لمديرة مدرسة متطورة، حيث قدمت شخصية "ميس زهرة" التى وهبت حياتها للتعليم وإدارته بشكل علمي متطور وحديث.

مسلسل "دايما عامر" بطولة مصطفى شعبان، لبلبة، ميرنا نور الدين، عمرو عبد الجليل، نضال الشافعى، صلاح عبد الله، محمد ثروت، كريم عفيفى، سينتيا خليفة، محمد محمود، أحمد الشامى، سما إبراهيم، محمد جمعة، أمل رزق، فادية عبد الغنى، لمى كتكت أحمد عنان وعدد آخر من الفنانين الشباب.​​