5 حلول سريعة في الفريزر لرمضان

لو انتي بتشتغلي و رمضان قرب هتكوني محتاجة ان اكلك يكون بيخلص بسرعة ... سواء عندك عزومة او عشان الناس في البيت صايمين طول النهار و جعانين في حاجات لو موجودة في الفريزر ممكن تنقذ الموقف في يوم شغل طويل او لو في يوم مش عايزة تعملي اكل والحاجات دي زي:

صواني :
صينية المكرونة الباشميل و صينية البطاطس باللحمة المفرومة من اشهر الصواني القابلة للتخزين و مسعفة جدا بتطلع من الفريزر علي الفرن ساعة او اقل بتكون علي السفرة و بياكلوا منها و علي بال ما تستوي تكون عملتي البانيه او سلقتي الفراخ و عملتي السلطة

المحاشي :
لو عندك في الفريزر انواع المحاشي متقورة و جاهزة علي الحشو دا هيسعفك كتير اوي هتروحي تعملي الخلطة لحد ما الثلج يسيح شوية و تحشي و تسوي الحاجة علي طول و تبقي الاكلة جاهزة و مننساش طبعا الفلفل و الطماطم نكمل بيهم لو الكمية مكفتش

الفراخ :
خلي عندك في الفريزر فراخ متبلة لان دي ممكن تخرجيها تسيح شوية و تحطيها في الفرن هتستوي بسهولة و لحد ما تستوي تكوني عملتي سلطة و رز او مكرونة
و كمان الفراخ البانيه لو عملتيها ببيض و بقسماط و شيلتيها في الفريزر ينفع تقليها بتلجها و بتطلع مقرمشة حلو اوي و قدميها مع مكرونة بالصلصة

الثوم و البصل:
افرمي الثوم و البصل و شيليهم في الفريزر عشان متاخديش وقت في التقطيع لو هتقلبي حاجة في البصل

الصلصة :
اعصري طماطم و شيليها عشان تستخدميها لو هتسوي محشي او خضار مطبوخ و ممكن تسبكي صلصة و تشيليها متسبكة و توفري علي نفسك وقت اكتر

يمكنك متابعة أهم وأحدث المقالات على الفيس بوك عبر صفحة مصراوى - هو وهي