ياسمين صبري: "بدأت اشتغل وعمري 17 سنة واتعلمت أكسب فلوس من بدري"

تحدثت الفنانة ياسمين صبري عن استقلال المرأة ماديا، وعن بداية رحلتها مع العمل مبكرا من أجل الاعتماد على نفسها، وذلك خلال وجودها ضيفة على بودكاست "موعد مع لميس" تقديم الإعلامية لميس الحديدي والمذاع على "مصراوي".

وقالت ياسمين: "أنا بشتغل من وأنا عندي 17 سنة، وأنا في الجامعة بيبقى فيه حاجة اسمها Summer job بتبقي بتطلعي بتسافري أمريكا مثلاً في وقت الصيف وبتشتغلي، فكانت برضه فكري فيه مختلف، كل الناس بتسافر تبقى بتبيع لعب في الحتت اللي هي بتبقى زي الملاهي، أو Waitress، وأنا مصرية معنديش الجنسية بتشتغلي كدة إيه من تحت الترابيزة، اشتغلت يوم وقولت أنا مش قادرة أكمل، فأختي حتى قالتلي: فاكرة نفسك هتيجي أمريكا تشتغلي إيه؟ مديرة بنك؟ فقولتلها: لا أنا مش مقتنعة، في الآخر اشتغلت في محل مجوهرات".

وتابعت: "أنا كنت ماشية في شارع حلو أوي لذيذ وبصيت على محل كان قدامي وقولت إيه ده، أنا أتمنى أشتغل في مكان زي ده، فعديت الشارع ودخلت وقولتلهم أنتوا بتوظفوا؟ واشتغلت في المحل ده وهو علمني مثلاً فكرة المجوهرات والأحجار، وأنا بحب كل ما هو جميل زي أي سِت، فاتعلمت مثلاً إني أشتغل من وأنا عندي 17 سنة، وكل سنة أروح في الصيف أرجع تاني لنفس الوظيفة، فاتعلمت إن أنا أكسب فلوس من بدري واستقل".
الاستقلال المادي

وأضافت ياسمين متحدثة عن أهمية استقلال المرأة ماديا، موضحة: "الاستقلال المادي مش شرط استقل عن أهلي يعني أطلع بره البيت، فكرة إنك بتكسبي فلوس وأنتي صغيرة فتقدري تشتري اللي أنتي عايزاه، مش محتاجة تقولي أنا عايزة أشتري الآيباد ده".

مضيفة: "أولاً هي الحتة دي حساسة شوية بس جزء من قوة الست في استقلالها المادي، وده حسب الراجل اللي حواليها، كزوج، كأب، كأخ، فيه الطبيعي الراجل السوي اللي هو طبعاً موجود هو اللي بيعول المرأة، ولكن أحياناً الدنيا مابتكونش كاملة أو ظروفها أصعب، فالست بتواجه أب أو ظروف أو زوج أو بيت بيكون الراجل لا يعولها".

واختتمت حديثها عن الاستقلال قائلة: "استقلال المرأة المادي بيكون مفيد جداً، وبيعلم الست أولاً إن بيكون ليها رأي، تعرف تقول آه أو لأ، يكون عندها حرية الاختيار، الراجل نفسه اللي بيتعامل معاها بيعملها حساب، ما يجيش عليها أوي، لكن فيه رجال أسوياء في نفس الوقت، بس أنا بتكلم على كل النماذج، فعلمني كتير طبعاً، علمني إن أنا أصلاً أكون حرة".

آخر مشاركات ياسمين صبري في السينما

كانت آخر مشاركات ياسمين صبري على شاشة السينما بفيلم "المشروع X" عام 2025.
تدور أحداث الفيلم حول عالم آثار يعمل على مشروع متعلق بالطاقة في غرفة سرية بالهرم الأكبر، ليدخل بعدها في صراع مع منظمة دولية غامضة تحاول إخفاء المعلومات التي يبحث عنها، ويتقاطع طريقه مع عدة أشخاص يستعين بهم خلال رحلته التي تمتد في أكثر من دولة.
وشارك ببطولة الفيلم كل من كريم عبدالعزيز ، ياسمين صبري، إياد نصار، أحمد غزي، عصام السقا، هنا الزاهد، تأليف وإخراج بيتر ميمي.

اقرأ أيضا:
"وأخيرا".. أمينة خليل تعلن انتهاء تصوير مشاهدها في مسلسل "الأمير"

كارولين عزمي تعلق على جدل أول أجر لها في التمثيل