بعد إعلانه البحث عن فرصة عمل.. رامي نادر: مفيش صحاب في الوسط الفني
كتب : منى الموجي
الفنان رامي نادر
تابعنا على
وجه الفنان رامي نادر عدة نصائح لمتابعي حسابه الرسمي على موقع التواصل الاجتماعي فيسبوك، من محبي الفن والعاملين به، طالبا منهم العمل في مجالات أخرى إلى جانب سعيهم في الفن.
وأوضح رامي الذي أعلن خلال الأيام الماضية بحثه عن فرصة عمل ثابت من مكتب أو المنزل، أن كما هناك قصص نجاح هناك فشل "أنا الحقيقة عايز استغل ده وإن الناس تستفيد من اللي حصلي.. (ما تعملوش زيي حتى لو كنت واثق من موهبتك واجتهادك وسعيك علشان ما تبقاش زيي".
نصائح رامي نادر
وتابع "أولا الأخطاء اللي أنا عملتها ماتعملش زيها: كذا حد مشكورا بعتلي وطلب الـ cv، اكتشفت إني ماعنديش cv شغل عادي، أنا اشتغلت مؤلف ومخرج وممثل (اكتر حاجة اشتغلتها وكنت عايش في حدود عليها) وتدريب ورش تمثيل فقط، مافيش أي عمل تاني اشتغلته طول حياتي".
وأضاف "أنا خريج تجارة شعبة محاسبة، وآداب مسرح شعبة تمثيل. النتيجة ماتشتغلش فن فقط وبأكد حتى لو أنت موهوب عني مليون مرة أو مجتهد عني مليون مرة.. لازم يبقى عندك شغل تاني علشان يوم ما تقرر تغير تلاقي حاجة تشتغلها".
ومن واقع تجربته خلال السنوات الماضية، كتب "مافيش حاجة اسمها صحاب أو عشم في الوسط الفني، النتيجة: أولا/ ماتضحيش بشغلك أو بنفسك علشان حد مهما كان صاحبك أو حتى أخوك.. ساعد لو تحب لكن ماتفضلش صحوبيتك على نفسك لأنه في العكس مش هيعمل أقل من اللي انت عملته. ثانيا/ مافيش وعود ولا كلمة تاخدها من حد وتتعشم وتعيش عليها لأنها ساعة الجد لما ماتحصلش هتحبط وتكتئب وتكره الناس وتكره نفسك، النتيجة اعتمد على نفسك لا تصدق وعود ولا تدي وعود لإن غالبا ماحدش قد الوعد ده".
رامي نادر: الفن لازم يبقى هواية
واختتم رامي "أخيرا.. شكرا لكل حد اهتم وبعتلي وفعلا فيه حاجات ممكن اشتغلها وتأمن الحياة، بعتذر لأي حد أنا كنت سبب إنه يحب الفن (إلا لو نجح)، أنا ماكانش قصدي أضرك والله، أنا كمان كنت بحب الفن لدرجة خلصت دراسة تجارة، ودخلت درست ٤ سنين مسرح وورشة أجنبية ومصرية، ونقلت اللي اتعلمته بكل أمانة زي ما أنا بقولك دلوقتي بكل أمانة لازم تشتغل شغل تاني والفن يبقى هواية، والأقل اهتمام في حياتك (احتياطي) لإن فيه ناس بينجحوا عادي من غير ما حد يساعدهم ولا يقف جنبهم وفيه اللي عندهم طرق تانية، لو ضامن النجاح يبقى اشتغل فن بس".
واعتذر رامي في نهاية منشوره لأسرته وابنه: "كان نفسي أبقى مصدر فرح وفخر لأهلي وابني اللي بعتذرلهم بردو على الإحباط اللي عايشينه معايا، فعلى الأقل ما أبقاش مصدر خيبة أمل، آه هدور على شغل أعيش منه بعد الأربعين ومش شايف إنه عيب عليا أو يأس مني".
رامي نادر: أبحث عن فرصة عمل مكتبي
كان رامي أعلن عبر "فيسبوك" بحثه عن فرصة عمل مكتبي أو من المنزل، وكتب قبل يومين تقريبا: "لو فيه حد عنده مجال لشغل من البيت أو عمل مكتبي ثابت.. يبعتلي ملحوظة الشغل ليا أنا"، وأعاد طلبه في منشور جديد: "أبحث عن عمل مكتبي أو من المنزل أي عدد من الساعات.. لا يشترط الخبرة.. أجيد أي عمل مرتبط بالكمبيوتر والتكنولوجيا وإدخال البيانات والحسابات.. اللغة الإنجليزية جيدة.. من لديه عمل مشكورا يتواصل معي على الخاص".
يُذكر أن آخر ظهور لـ رامي كان في مسلسل كارثة طبيعية، ومن أبرز الأعمال التي شارك فيها خلال مشواره الفني: مسلسل الصفارة، فيلم 1000 مبروك، مسلسل اللعبة، مسلسل تامر وشوقية الجزء الثالث والجزء الرابع، مسلسل راجل وست ستات (الجزء السادس)، والجزء الثاني من مسلسل حرمت يا بابا.
اقرأ أيضا
"أكبر مني بـ 24 سنة".. منة فضالي: "اتجوزت في السر ووالدتي جالها شلل بسببي"
