مصطفى البنا لـ "مصراوي": تركي آل الشيخ كان أكبر داعم لي بعد ربنا ورفضت "بابا المجال"

كتب- مروان الطيب:

يحقق الفنان الكوميدي الصاعد مصطفي البنا الشهير بـ "سعفان" نجاحاً على الصعيدين التليفزيوني والسينمائي، وعلى الرغم من انتقاد البعض بأن خطواته ربما تكون بطيئة ولكنها ثابتة ومؤثرة .

وفي تصريحات خاصة لـ "مصراوي" تحدث "البنا" عن بداياته كصانع محتوي على السوشيال ميديا مرورا بتقديم برنامج "سعفان في التليفزيون"، ومشاركته مؤخراً بعدد من الأعمال التليفزيونية والمسرحية كان آخرها مسلسل "اللعبة 4"، و"دوري الأبطال" بطولة النجمان شيكو وهشام ماجد إلى جانب دعم المستشار تركي آل الشيخ رئيس الهيئة العامة للترفيه لموهبته الكوميدية.

وتحدث "البنا" عن الانتقادات التي يرددها البعض بشأنه، قائلا: "الناس على طول تقولي أنت متكبر وأنت شايف نفسك وأنا بالعكس غير الكلام ده تماماً وبحاول دايماَ أكون قريب من الناس وبعمل المواضيع بتاعتي بعفوية وبتلقائية وبحاول أكون خفيف، ده أنا حتى لسه بروح ألعب كورة في الدرب الأحمر عادي".

وعن مشاركته مؤخراً بمسلسل "اللعبة 4" قال: "أستاذ معتز التوني كلمني ورحب بوجودي في المسلسل والكواليس كانت خفيفة وكوميديا جداً وكنت شغال وسط ممثلين من العيار التقيل في الكوميديا وهما هشام ماجد وشيكو والناس كانت في منتهى اللطف وأنا أصلا من متابعي المواسم اللي فاتت من المسلسل وانبسطت جداً اني شاركتهم الموسم الرابع".

وتطرق "البنا" لاختياراته الفنية قائلا: "أنا مبحبش أشتغل في حاجة أكون مش مؤثر فيها يعني أنا أتعرض عليا مسلسلين في رمضان اللي فات وهما (الأجهر) و(بابا المجال) وبالتحديد شخصية أحمد كشك في بابا المجال ورفضت الاتنين عشان الأدوار مكنتش مؤثرة وعندي أعمل مشهد واحد مؤثر على اني أطلع 30 حلقة وأبقى تقيل على الناس".

كما تحدث "البنا" عن المستشار تركي آل الشيخ رئيس الهيئة العامة للترفيه قائلا: "الراجل ليه فضل كبير عليا بعد ربنا وكنت في هولندا عام 2019 وقت ما كلمني وكان بيجمع معظم اللي شغالين على السوشيال ميديا وقتها واداني مساحة وفرصة خاصة أني أكون متواجد بفعاليات الرياض والحمد لله ردود الأفعال بسطتني جدا".

وعن برنامجه "سعفان في التليفزيون"، فأضاف: "أنا بحضر دلوقتي لموسم جديد من البرنامج وإن شاء الله هبدأ تصوير أول الحلقات خلال الفترة اللي جاية".