إعلان

حماقي عن عودته لزوجته: "فكرة ممكن تتجوز كانت بتضايقني ومكنتش بعرف أنام"

06:20 م الأحد 01 يناير 2023

كتب- منى الموجي:

قال الفنان محمد حماقي، إن قرار عودته لزوجته نهلة كان قرارا رومانسيا، وجاء بعد عامين من الانفصال، وذلك خلال حواره مع النجمة إسعاد يونس ببرنامج "صاحبة السعادة"، في حلقة خاصة للاحتفال بالعام الجديد 2023.

وأضاف حماقي "العودة بعد الانفصال كانت عودة رومانسية مش عقل، انفصلنا سنتين وكان فيه ناس متعرفش محدش خد باله، كنت حريص مقولش عشان ميحصلش أي تجاوز لان فيه ناس هتتجاوز، وأنا محبش حد يتكلم عليها أصلا، قرار الابتعاد كان بالعقل والرجوع بالقلب".

وأشار حماقي إلى أن أسباب الانفصال: "كان فيه مرحلة مش عايز أقول عدم تفاهم بس كلكعة ولغبطة، حسينا إن الأسهل كل واحد يرتاح من التاني، واكتشفنا ان فات عليا سنتين مش عارف اشوف حد ومش عايز اشوف حد تاني، مش عارف امشي وكل يوم لما اجي أنام تيجي في دماغي فكرة ما هو ممكن تتجوز ما أنامش، ميجيليش نوم وابقى متضايق جدا طب ليه بعمل كده في نفسي، وأوقات الانفصال بيكون مفيد لأننا بنبقى في وش بعض ومش شايف غير الحاجات البايخة، لما بنبعد بنشوف حاجات مختلفة".

وأكد أن الانفصال عامين ثم العودة رغم عدم وجود أطفال دليل كبير على الحب "ودليل كبير أن يفوت سنتين من الانفصال، وده مش وقت قليل ومكناش لسه خلفنا يعني سهلة أوي إننا منرجعش، ومفيش حاجة ترجعنا أصلا، بس رجعنا في النهاية، وأنا الحقيقة بحب نهلة جدا من كل النواحي، بحبها بعقلي ومقتنع جدا وبحبها بمشاعري، الحمد لله أن إحنا رجعنا، الحمد لله اننا رجعنا".

جدير بالذكر أن حماقي أحيا أمس السبت 31 ديسمبر حفل ليلة رأس السنة في العاصمة الأردنية عمان، وجاء ظهوره في برنامج "صاحبة السعادة" من خلال حلقة مسجلة.

فيديو قد يعجبك: