بوسي "خايفة" على نجومية محمد رمضان وخالد زكي يعترف بأكبر خطأ ارتكبه.. تصريحات نجوم "الفن×أسبوع"

إعداد- منى الموجي:

تتنافس البرامج التليفزيونية كل أسبوع على استضافة أشهر نجوم ونجمات الفن، للحديث عن أمور شخصية وفنية، تضمن الخروج بتصريحات جريئة، تحقق أعلى نسب مشاهدة. وفي السطور التالية، يستعرض "مصراوي" أبرز 7 تصريحات لأهل الفن في البرامج خلال الأسبوع الماضي "بوسي تعلق على غناء محمد رمضان، خالد زكي يكشف عن أكبر خطأ ارتكبه، سبب اتجاه محمد رمضان للغناء، وراغب علامة يتحدث عن أخر اللحظات في عمر والده،..."، وغيرها من التصريحات التي نستعرض أبرزها في السطور التالية..

بوسي

حلّت المطربة بوسي، ضيفة على برنامج "تحت السيطرة" الذي تقدمه أروى على قناة النهار، وكشفت عن موقفها من غناء الفنان محمد رمضان.

وقالت بوسي "محمد رمضان نجم كبير، ممثل شاطر جدًا واشتغلت معاه في فيلم (الألماني) وكان وشي حلو عليه، ربنا يكرمه دايمًا، هو حابب يغني"، مضيفة "هو ناجح بس مواضيع أغانيه ممكن تؤذيه، في التمثيل لا غبار عليك الله وأكبر بس حكاية غناه كتير ممكن يتأذي بسببها، خايفة على شكلك وعلى نجوميتك تتهز، وربنا يحميك يارب".

خالد زكي

استضاف الإعلامي عمرو الليثي في برنامجه "واحد من الناس" المعروض على قناة النهار، الفنان الكبير خالد زكي، والذي كشف عن أكبر خطأ ارتكبه في حياته.

قال خالد "اعتذرت مرة عن مسلسل كان ممكن أيامها يعوضني سنين عشان أقدر أغير جلدي، جالي مسلسل (بابا عبده) واعتذرت عنه لأستاذ محمد فاضل، قالي مش قابل اعتذارك فكر تاني واعتذرت تاني، مكنتش عايز أعمل أدوار ضد الأب والشر والحاجات دي".

وتابع "كنت هعمل دور فاروق الفيشاوي وكان فتحة خير على فاروق، قعدت سنين بعدها أعافر عشان أطلع من الأدوار الرومانسية، لحد ما عملت عمل هايل جدًا وحصلت بسببه على جائزة وكذلك الكاتب أسامة أنور عكاشة والمخرجة إنعام محمد علي، كان سهرة اسمها (حب بلا ضفاف) وجالي أستاذ فاضل كان بيعدي بيزور الاستوديو، قالي جاي دلوقتي تعمل الأدوار دي واعتذرتله لإني غلطت مكنش عندي خبرة كفاية وقت ما عرض عليا المسلسل".

سلوى خطاب

خلال استضافتها في برنامج "قطعوا الرجالة" الذي تقدمه المذيعة راغدة شلهوب على قناة النهار، وصفت الفنانة سلوى خطاب نفسها بأنها امرأة تستطيع تحمل المسئولية.

وقالت "حريتي مختلفة شوية، عندي الحرية معناها مسئولية وابقى مقتنعة إن حريتي شيء جميل لو تعاملت معها بشكل كويس، واخد بالي من نفسي وتصرفاتي وحياتي مش عشان خاطر حد ولا الناس والمجتمع لأ عشان نفسي"، وأكدت أنها ست بـ100 ست "كل الستات عندها اكتر من شخصية".

محمد رمضان

يواصل الفنان أمير كرارة تقديم برنامجه "سهرانين" على قناة ON E، واستضاف في الحلقة الماضية الفنان محمد رمضان، والذي كشف عن السبب الذي جعله يُقدم على خطوة الغناء.

أوضح رمضان "هو نفس السبب اللي خلاك تمثل، انت إعلامي الجمهور استمتع بتمثيلك فبقيت النجم أمير كرارة، أنا عملت إعلان الغنوة بتاعته لقيتها منتشرة في كل حتة الأفراح وأعياد الميلاد، ده السبب".

وأضاف "جاءتني عروض وأنا مؤمن إن أي شيء لا يُترجم لمادة فهو فاشل، لقيت شركات كبيرة زي المنتج محسن جابر والمنتج صاحب إسحاق جروب بيعرضوا عليا إنتاج أغاني، لقيت نوع مش موجود في مصر وانا بس اللي بقدم النوع ده، كاني بتكلم عادي بسميه تمثيل غنائي، بمثل بالغنا، أنا مش مطرب والناس مبسوطة وأنا شغال عشان أسعد وأبسط الناس".

تامر حبيب

قال السيناريست تامر حبيب أثناء استضافته في برنامج "أنا وبنتي" الذي يقدمه الفنان شريف منير وابنته "أسما" على قناة ON E: "بقى فيه حكم أخلاقي من الناس من برا على حاجات اسمها عيب مش شرط انها عيب فعلا، زي مثلًا الحكم على لبس الست".

وتابع "في وقت من الأوقات في السبعينات في أفلامنا وحياتنا وصور أهالينا الحياة كانت لذيذة وبسيطة، بيلبسوا ميني جيب زمان كان فيه احترام للست وهي ماشية في الشارع دلوقتي الاحترام ده ممكن ميكونش موجود للست المنقبة".

أيمن بهجت قمر

تحدث السيناريست والشاعر أيمن بهجت قمر عن تعاونه مع الفنان أحمد حلمي في برنامج "قهوة أشرف"، الذي يقدمه الفنان أشرف عبدالباقي على قناة الحياة، قائلًا "حلمي أول مرة عرفت انه ممثل قوي كان في فيلم (كده رضا) لما عرفت الفرق بين التلات شخصيات من غير ما يتكلم".

وتابع "لما اتعاملت معاه في (أسف على الإزعاج) مكناش عارفين هيعمل الدور إزاي، كنا في استوديو مصر أول المشاهد كان مشهد مدام دلال اللي بتقوله فيه مش هيرد عليك، عيطت والله أبهرني ابن اللذينا مكنش مبين هيعمل الدور إزاي".

واستكمل "بحب في (اكس لارج) اننا متريقناش على التخان، ده دور الفن يأثر في الناس بشكل إيجابي، لان فيه فن يشجع وفن يحبط".