إعلان

علاقتي بزوجي طيبة والحجاب ليس مقياسًا للتدين.. أبرز تصريحات حلا شيحة مع "الإبراشي"

04:01 م الأحد 12 أغسطس 2018

كتبت- منى الموجي:

حالة من الجدل، أثارتها الفنانة حلا شيحة مع الإعلان عن عودتها لعالم التمثيل بعد فترة غياب طويلة اقتربت من 13 عامًا، ومع خلعها النقاب ومن بعده الحجاب، فبين مرحب بعودتها وغاضب من قرار تخليها عن الحجاب، وبين من دعاها للتراجع عن قرارها، استقبلت مواقع السوشيال ميديا الكثير من المنشورات والفيديوهات، من جمهور عادي أو مشاهير الوسط الفني وبعض الشيوخ.

وفي مداخلة هاتفية أجرتها حلا مع الإعلامي وائل الإبراشي، في برنامجه "العاشرة مساءً" المعروض على قناة "دريم"، حاولت حلا الرد على كل ما أثير بشأنها في الساعات الماضية، وفي السطور التالية أبرز التصريحات التي جاءت على لسانها..

- رغبت في العودة إلى الفن والتمثيل، وكنت متوقعة ردود الأفعال على القرار، لكن ما ضايقني الهجوم عليّ. أؤمن بأنه من حق كل شخص أن يعبر عن إحساسه ورأيه ولكن الفكرة في أن يكون الانتقاد بدون تجريح أو تقليل من الشخص الآخر.

- سعيدة بقرار عودتي للفن، لأنني أراه رسالة عظيمة جدًا، ومن خلاله أستطيع تقديم أعمال جيدة تكون سببًا في تغيير الناس لما هو أفضل، "بيحطوا الفن في حتة إن كل حاجة فيه حرام، وده مش حقيقي أي حاجة فيها الحلال والحرام، حابة أتواجد بين جمهوري اللي بيحبني، وبقول لأي حد زعل لخلعي الحجاب متزعلوش وأنا هقدم أعمال كويسة ومحترمة وهادفة".

- تعليقًا على ما كتبته خديجة خيرت الشاطر عنها، قالت "معنديش صداقات عنيفة مع أي حد من أي نوع، ولم أكن في يوم صديقة لخديجة، فقط تعرفت عليها لأن أولادها في نفس المدرسة التي يذهب إليها أبنائي، وكانت علاقة طيبة وهي إنسانة لطيفة مش أكتر من ده".

- "انتقبت وتحجبت وكنت في حالي مع زوجي وأسرتي ولم أنتمِ لأي جماعة بأي شكل، كنت مؤمنة بحاجة وأمارسها بعيدًا عن أي تشدد أو تطرف".

- "محدش يعرف خواتيم حد ولا حد يقدر يشق عن قلب حد، مينفعش حد يطلع يقول نهايتك هتبقى عاملة إزاي، مينفعش أحكم على حد لأنه شال النقاب أو الحجاب، مش من حق حد أن يحكم على العباد، ربنا سبحانه وتعالى هو من يرى القلوب".

- "استغربت من فيديو الشيخ محمد الصاوي، حتى لو حصل بينه وبين زوجي هذا الكلام فخروجه للحديث عنه على الملأ انتهاك للخصوصية، وزوجي تضايق من الموقف وفيه كلام قاله الصاوي لم يصدر عن زوجي".

- "احنا شعب عاطفي بنتأثر بأبسط الحاجات، مقدرة إن فيه بنات كتير زعلوا عشان خلعت الحجاب، فاهمة إحساسهم بقولهم براحة عليا شوية، مفيش حاجة وكل واحد له أحواله وبيمر بمراحل بيكتسب منها حاجات، وكل الفترة اللي فاتت تعلمت حاجات في ديني جميلة جدا، وعارفة إن الحاجات دي هتفضل معايا لحد النهاية، المرة دي أنا في مرحلة مختلفة، ومش حابة أي حد يزعل مني".

- التعاملات والأخلاق مهمة جدا، الحجاب ليس مقياسًا هو جزء يُشكل شيئًا مهماً، لكن هذه النقطة علينا أن نتركها بين العبد وربه.

- "محدش يتحدث باسم الإسلام، كل واحد في الدنيا له دور في الآخر ربنا هيحاسب الكل".

- تخليت عن النقاب لفترة وأنا في كندا، وكثيرات تفعلن ذلك في البلاد الأجنبية للتعرف من ناحية الأمان".

- ردا على تخليها عن الحجاب بسبب اشتياقها لتصفيق الجمهور، قالت "اشتغلت وأنا عمري 13 سنة، والناس بتصقف من أول حاجة مثلتها، ومن أنا في بيت أهلي أعرف فنانين كبار منهم مدحت صالح، تربيت معاهم مش مستنية الشهرة طول عمري مشهورة حتى لما لبست النقاب الناس بتتكلم عني طول الـ11 سنة اللي فاتت، وأحب الناس وأحب أتكلم معاهم ومش حاجة أخجل منها الحمد لله كويسة ومش محتاجة حاجة".

- "أحب الفن منذ طفولتي، الرقص والرسم، رغبتي في العودة للتمثيل شيء لا يدينني الفن حاجة جميلة وتعلمت ده من والدي، عايزة أعبر عن حاجة جوايا حلوة وراقية".

- "كل واحد يقول اللي هو عايزه فيه آراء بعضها متحجر، ولا يحاولون توسيع مداركهم للتفكير بشكل مختلف عن الانغلاق اللي بيعيشوا فيه، ربنا قال إن الدين رحمة للعالمين مش عذاب دين سلام ورحمة ومتواضع، وإني أكون داعية صابر على الناس حتى في عز معصيتهم وأحببهم في الدين بأسلوبي الطيب، أكيد هخليهم في يوم من الأيام يحترموا وجهة نظري طول ما أنا غليظ مش هقدر أوصل لأي حاجة، إحنا دينا دين عظيم".

- "علينا أن نتعلم من النبي كان عنده صبر ولا يتلفظ بكلمة تأذي حد، لما نسترجع سيرته هنعرف أد إيه هو نبي عظيم وكذلك سيدنا عيسى وسيدنا موسى، وللناس اللي بتنتقدني إنتم فين من ده".

- "وأنا لابسة النقاب كنت أرفض كلام التكفير، ده مش دينا وهي كلمة خطيرة جدا لا يمكن أن يتلفظ بها أي إنسان".

- حياتي الزوجية مستقرة وعلاقتي بزوجي وأولادي طيبة، وهم أغلى ما في حياتي، وأتكلم مع زوجي يوميًا هو حاليًا في كندا وأنا وأولادي في إجازة بمصر، وسأقيم الفترة المُقبلة بين مصر وكندا".

- "والدي يحترم رغباتي في كل الأحوال، حتى في الوقت الذي كان يرفض فيه ارتدائي للنقاب".

- "اللي عايز يدعيلي يدعيلي، لكن مش حابة حد يقول ارجعي وعودي كأني تنصلت من الدين، وكأن ليس هناك وسط".

جدير بالذكر أن آخر أعمال حلا شيحة كان فيلم "كامل الأوصاف" في 2006، وقدمته وهي مرتدية الحجاب، بطولة عامر منيب، حسن حسني، رجاء الجداوي، علا غانم، إيمي سالم، تأليف أحمد البيه، إخراج أحمد البدري.

فيديو قد يعجبك: