محمد مشيش عن الدراما التليفزيونية: نعيش أزمة كبيرة ولا أحب تقديم أجزاء ثانية

تصوير- علاء أحمد:
أكد المنتج محمد مشيش أن الدراما التليفزيونية تعيش صراعا مع الوقت، مشيرا إلى أن القائمين على الصناعة يأخذون قرارات متأخرة.
وتابع مشيش في جلسة حوارية نظمها مهرجان الجونة السينمائي اليوم السبت وأدارتها النجمة ريهام عبدالغفور: "أنا بقف ضد طريق الإنتاج مش عايز أوفر إذا الميزانية محطوطة والموضوع هيخلص بالمكان المناسب طبعا، وده مش بيحصل لإن إحنا على طول خسرانين".

محمد مشيش

أضاف مشيش "أنا بتدخل في الورق وطريقة تنفيذ المشروع نفسه، في المشروع كله كتفاصيل من برومو لموسيقى وأحب أخفف شوية عن المخرج لأن المراحل صعبة، أنا ابن سوق لازم أعرف الناس حابة إيه: المنصات والقنوات عايزين يقدموا إيه، طريقة تقديم الفكرة، حتى المسموح وغير المسموح لأن اللي يتعرض في رمضان غير اللي خارج رمضان، الأخير ممكن أكون اجرأ شوية فيه"

ريهام عبدالغفور

ووجهت ريهام عبدالغفور سؤالا لـ مشيش، قائلة "هل ممكن تتحمس لمشروع وبعدين تحس أنه مش وقته؟"، ليرد "ممكن وده بيكون نابع من إحساس أو ظروف الوقت، مثلا مشروع زي جراند أوتيل مهم بس لو جالي دلوقتي مش هقدر أشتغل عليه".
ورفض مشيش فكرة تقديم أجزاء ثانية من المسلسلات "مش بحب أعمل جزء تاني إلا لو كان من الأول متأسس له، في السينما الموضوع مختلف لكن في المسلسلات لأ مش بحب أكرر الحكايات بحس أن كل مسلسل له حكاية وهدف".

تحديات صناعة الدراما التليفزيونية

وعن أبرز التحديات التي تواجه الصناعة، أوضح "عايزين وقت ومنصات تتبنى المشاريع بدري مش يطلبوا المشروع قبلها بشهرين أو تلاتة، ليه منفكرش في مشروع دراما لرمضان 2028، ودي مش في إيدينا إحنا دي بإيد الظروف اللي بنعيشها لو صارت مشاكل بنوقف، الأمور ماشية بنفتح نشتغل، إحنا عايشين في أزمة كبيرة، والحلول إننا نحط رجلنا على الأرض، ده مش تنازل ده تعايش لحد ما نمر من الأزمة".

شهدت الجلسة التي أقيمت في مركز الجونة للمؤتمرات والثقافة، عدد كبير من النجوم، بينهم: أحمد السعدني، بسمة، نجلاء بدر، ريهام عبدالغفور، صدقي صخر، طارق العريان، مفيدة شيحة، داليا شوقي، إنجي المقدم، المخرج هاني خليفة، محمد الشرنوبي، ركين سعد، أندرو محسن.
اقرأ أيضا
مينا مسعود عن مهرجان الجونة: "المهرجان الأجمل في الشرق الأوسط"

منى زكي عن أحمد حلمي (مازحة): الكوميديانات ناس هادية على الحقيقة وبيعانوا من كآبة بالبيت