سميح ساويرس: "الجونة السينمائي" سيكون عالميًا.. وحجم الحضور أقل من الأعوام الماضية

كتبت- منى الموجي:

قال رجل الأعمال سميح ساويرس، أحد مؤسسي مهرجان الجونة السينمائي، إنه رهن تأجيل أو إقامة الدورة الرابعة لمهرجان الجونة السينمائي، بإقامة مهرجاني فينيسيا وسان سيباستيان.

وأوضح في مؤتمر صحفي أقيم ظهر اليوم في أحد فنادق القاهرة بوسط البلد، للإعلان عن تفاصيل الدورة الجديدة: "قلت لو المهرجانين دول اتعملوا هيبقى ضربة جامدة ورسالة للعالم إن مصر لو ألغت مهرجان الجونة، فهي قلقانة، كان هيطلع سمعة إننا كبلد عندنا مشاكل".

وتابع سميح "الشباب كانوا في فينيسيا وأخدوا النموذج وهنطبقه في الدورة الجديدة، ووزارة الصحة وافقت تكون معانا".

وأشار أن حجم الحضور هذا العام سيكون أقل من الأعوام الثلاثة الماضية، متابعًا: "دي مشكلة تواجهها جميع الدول، عندنا الجو العام اللي بيتعمل هيكون موجود لكن بصورة أصغر، وهذا العام بذلنا مجهود عشر أضعاف السنين اللي فاتت، والسنة دي هيبقى مهرجان عالمي فعلا، بحضور 200 شخصية من الخارج، ودول سفراء بيبينوا للناس إن مصر بخير".

واستكمل سميح متحدثًا عن حجم الإنفاق على المهرجان "السنة دي مفيش حاجة بتصرف على نفسها، نستثني السنة دي، بس عامة كل سنة بنلاقي دعم أكتر من الرعاة وده بحد ذاته نجاح، أعتقد إن المهرجان سيحتاج 10 سنين عشان يقدر ينفق على نفسه".

قدم المؤتمر الإعلامية لميس الحديدي، حضره رجل الأعمال نجيب ساويرس، الفنانة يسرا، الفنانة بشرى، المخرج أمير رمسيس، مدير المهرجان انتشال التميمي، الفنانة كندة علوش، الفنان آسر ياسين.