فيديو| يسرا تقدم لشريف عرفة جائزة فاتن حمامة.. والأخير يشكر ماهر عواد و"الزعيم" ووحيد حامد

كتبت- منى الموجي:

صعدت الفنانة يسرا على خشبة مسرح دار الأوبرا المصرية، لتقدم جائزة فاتن حمامة التقديرية للمخرج الكبير شريف عرفة، في حفل افتتاح الدورة 41 من مهرجان القاهرة السينمائي الدولي.

وقالت: "مساء الفل والجمال عليكم، ايه المهرجان الحلو ده يا حفظي، سعيدة بوجودكم وإني هقدم شخصية من أعظم الناس اللي قابلتها في حياتي، عملت معاه 3 أفلام من أعظم افلام السينما المصرية، لأنه بيشوفني بعين مختلفة مش بشبع منه بحب اتفرج على شغله مفيش حد زيه".

واستقبل الحضور عرفة بتصفيق حاد، قائلا "الاستقبال ده أهم حاجة حصلت لي في حياتي، الوقوف ورا الكاميرات ده اللي بجيده لا أجيد الكلام، هتكلم عن الناس اللي بسببهم أنا واقف هنا، من أول البيت اللي اتربيت فيه أمي وأستاذي الأول والدي المخرج سعد عرفة وأخويا عمرو عرفة".

وتابع: "اتعلمت من أساتذة كتير حسن الإمام، محمود مرسي، محمد خان، ولازم أشكر أخويا ماهر عواد اللي ساب وظيفة مريحة في الخليج وجه عشان نعمل أفلام تعبر عن أحلامنا وعملنا أفلام مانجحتش جماهيريا، من وسط الضلمة دي ظهر لي نور اسمه وحيد حامد عملنا مع بعض أفلام مهمة في حياتي وهي سبب وجودي هنا اليوم، ومش ممكن أنسى أشكر العظيم عادل إمام، وأشكر كل الفنانين الكبار اللي اشتغلت معاهم حسين فهمي، يسرا، أحمد زكي، سناء جميل، اللي أضافوا قيمة لأفلامي".

واختتم: "في الآخر لازم أشكر ست عظيمة هي زوجتي اللي دايما تدفعني لقدام، وبقول لأولادي أنهم حاجة كبيرة عندي، ويهمني إني أسيبلهم اسم يفخروا بيه هما وأحفادهم، وأتمنى أن حتى آخر يوم في عمري أفضل أقدم أفلام تعيش جيل ورا جيل".