شقيقة مودة الأدهم بعد الحكم بحبسها: أختي صغيرة وحرام تترمي مع بنات الليل

كتب- محمد جمعة:

قالت رحمة الأدهم، شقيقة فتاة تطبيق "تيك توك" مودة الأدهم، إن الحكم الصادر ضد شقيقتها بالحبس لمدة عامين والغرامة لم يكن متوقعًا، متابعة: "كنا ننتظر الرأفة بها، نظرًا لحداثة سنها، وعدم معرفتها بالقوانين.. وحرام تترمى مع بنات ليل جايين من كباريهات".

وأضافت "الأدهم"، خلال مداخلة بساعة السوشيال ميديا مع الإعلامية لميس الحديدي، ببرنامج "القاهرة الآن" المذاع على فضائية "العربية الحدث"، مساء الإثنين: "إيه اللي عملته أختي؟.. كل بنات جيلها بتلبس كده، وطول حياتها ناجحة، وكانت فاشون وجسمها حلو، وهي شخصية مرحة وضحكتها في وشها وبتسعد كل اللي حولها، ولما كانت تزورنا في البيت كنا كلنا بنضحك".

وتابعت شقيقة فتاة "تيك توك"، باكية: "أنا مش مصدقة، وأبويا مكنش مصدق وكان بيشوفها بالعافية في المحكمة.. وإحنا عيلة بسيطة بناكل ونشرب وننام مش فاهمين حاجة في البلد، حتى الوزراء مانعرفش أسمائهم.. وأنا دلوقتي مش عارفة أمشي بولادي في الشارع بعد التشهير ده والكلام اللي اتقال علينا في كل حتة".

ونفت شقيقة مودة الأدهم أن تكون شقيقتها هاربة من منزلها، موضحة أنها ابتعدت للتركيز في دراستها وكانت على اتصال دائم بها وتعرف كل تفاصيلها، متابعة: "أنا اللي ربتها على إيدي.. وتطبيق تيك توك مستخدم في مصر ومرخص وكل الناس بتستخدمه وهي مكنتش تعرف القانون".