ملحن "أحلى ونص" يكشف كواليس أغنية عمرو دياب الجديدة

كتب-مصطفى حمزة:

يستعد الفنان عمرو دياب، لطرح ثالث أغنياته في صيف 2021، وتحمل اسم "أحلى ونص"، وهي من كلمات أيمن بهجت قمر، ألحان محمد يحيى، توزيع أحمد إبراهيم، وميكساج وديجيتال ماستر أمير محروس.

الملحن محمد يحيى كشف كواليس تقديم الأغنية عبر صفحته في موقع فيس بوك، وكتب :"أحلى ونص، دي من الأغاني اللي هتفضل كواليس تلحينها في خيالي دايما عارفين ليه؟، بصوا أنا من شهرين جالي أصعب دور كورونا، تقريبا كان هيقضي عليا، وأنا بطبعي مبحبش أكتب عن أي حاجة سلبية، يعني جت لي كده وأنا مش معرف حد".

وأضاف:" في اليوم الخامس من الكورونا يعني في عز المعمعة والتعب، لقيت عمرو دياب بيكلمني بيقول لي أيمن بعتلوا موضوع كلام حلو، سمعني الكلام وأقسم بالله حرفيا كنت بموت من التعب، قلت لعمرو الكلام رهيب، وأنا عندي كورونا بس الأعراض خفيفة، هقوم اشتغل، وفعلا قفلت مع عمرو، وقاومت وقمت من على السرير، وصوتي مش طالع مسكت جيتاري ولحنتها وطلعت وان شوت"

وتابع يحيي،:" بعدها بنص ساعه اتصلت بعمرو، سمعها طار وقال لي تحفة، عشان كده مش هنسى ظروف تلحينها ، خلاصة الكلام الإصرار على النجاح ده دافع أوقات يكون أقوى من اي ظروف، طبعا أنا مش قصدي بالحكاية دي، أقول إني بطل العالم والجو ده، أنا بس من فرحتي بالأغنيه دي، عشان قد إيه وأنا بعملها كنت خايف من الكورونا قوي، النهاردة لما سمعتها حسيت بيها، حبيت اعرفكم".

واختتم الملحن:"معلومة مهمة عمرو دياب في عز الكورونا،كان كل يوم يحفزني، ويقول لي متخافش مش هاسيبك، أنا أشكره، وأقول مبروك يا هضبة".

وطرح المطرب عمرو دياب، أغاني"اتقل"، من كلمات تامر حسين، وألحان مدين، وتوزيع أحمد إبراهيم، و"الدنيا بترقص" وهي من كلمات ملاك عادل وألحان محمد يحيى وتوزيع أحمد إبراهيم.