"كان بيشرب شاي بالحلاوة عشان صوته".. أبرز تصريحات نجل حسن الأسمر عن والده

كتب- هاني صابر:

كشف الفنان هاني حسن الأسمر، تفاصيل عن والده الراحل، ببرنامج مساء Dmc مع الإعلامي رامي رضوان، وذلك في ذكرى وفاته التي توافق يوم 7 أغسطس عام 2011، إذ وافته المنية إثر تعرضه لأزمة قلبية، نُقل على إثرها للمستشفى، ليرحل بها عن عمر 52 عاما.

إليكم أبرز تصريحات هاني:

- "والدي في البيت حاجة تانية خالص، مالوش دعوة بالغناء خالص، وبيحب يلبس الطاقية والجلابية، وبيبقى ٩٠ ٪ بيعمل أكل، وكان كييف مطبخ، ولما بيخرج بره البيت بيبقى بتاع الناس".

- "قالي في مرة.. الحاجة اللي بتيجي من الشارع من الناس هتوصل لقلب الناس، وبتعلم معاهم، وألحانه من الحاجات اللي علمت مع الناس ومنها أغاني كتاب حياتي، سألوني، تاجر الصبر، عمري، أعملك إيه".

- "كان بيكتب على غلاف الألبوم حسن عبدالعزيز مش حسن الأسمر، ولما سألته عن السبب قالي: لو كتبت حسن الأسمر الناس هنا هتيجي تقولي ممكن تعملي أغنية، فكنت بقولهم إن حسن عبدالعزيز ده حد جاي من بره وسافر".

- "كنت عايز أغير صوتي بسبب تشابهه مع صوت والدي، لأن الناس كانت بتقولي دايما انت بتقلد والدك.. فرحت لدكتور أنف وأذن وحنجرة، وطردني، وقالي إنت متعلم ولا جاهل.. مخدتش حاجة في العلوم بالمدرسة اسمها الجينات الوراثية.. دي حاجة بتاعت ربنا أعملك أنا إيه فيها".

- "والدي كان رافض أدخل مجال الفن والغناء لأنه تعب في مشواره حتى أصبح من أفضل مطربي الأغنية الشعبية، وكان فيه مناسبة عيد ميلاد في البيت، ورحت غنيت (كتاب حياتي يا عين) ففوجئ بحفظي للأغنية، وأقنعه صديقه بدخولي معهد الموسيقى".

- "والدي تأثر بالبكاء أثناء تسجيل أغنية كتاب (حياتي يا عين)، وأخذ وقتا طويلا فيها لأنها موال".

- "والدي كان بيحب يشرب الشاي بالحلاوة الطحينية علشان الأحبال الصوتية".

يعد الفنان الراحل حسن الأسمر أحد نجوم الأغنية الشعبية على مدار العقود الماضية، وتربع على عرش الأغنية الشعبية لسنوات، خصوصاً خلال فترة التسعينيات من القرن الماضي، ومن أشهر أغانيه "كتاب حياتي"، و"متشكرين"، و"أعملك إيه حيرتني"، و"على فين يا هوا"، و"أنا أهه وأنت أهه"، و"أشكي لمين"، و"أدلع يا حلو"، و"الله يسامحك"، و"حرامي القلوب"، و"رمشه"، و"طعم الأيام"، و"كان نفسي".