رامي صبري لـ"مصراوي": "مشاركتي بالتوزيع في فارق معاك جت بالصدفة"

كتب - هاني صابر:

خاض المطرب رامي صبري، تجربة التوزيع لأول مرة في ألبومه الجديد "فارق معاك"، وتحديدًا في أغنيتي "فارق معاك" و"عجبى عليك يا زمان".

وقال رامي، في تصريحات خاصة لـ"مصراوي": "التوزيع موجود جوايا من زمان، ومكنش في دماغي خالص إني أقوم بتوزيع الأغاني، ولكنه موجود في دمي".

وأضاف: "دايمًا عندي وجهة نظر في الأغاني اللي بقوم بتلحينها، وكذلك الحال بالنسبة للتوزيع، وفي الآخر بعمل شكلي، والحاجة اللي بتليق بيا سواء في الغناء أو التوزيع أو التلحين، وليا طابع معين بحب أطوره طول الوقت، ومبحبش أقف عند حاجة معينة".

وبسؤاله هل سيتعاون توزيعيًا مع مطربين آخرين خلال المرحلة المقبلة قال: "معرفش والله تحديدًا، وخوضي لتجربة التوزيع السنة دي جت معايا بالصدفة، لإني مكنتش مركز في موضوع التوزيع، وبالنسبالي مش مُحدد بقاعدة معينة إني أقبل أو أرفض، ولو فيه حاجة جيدة ومناسبة هعملها، فالفنان الشامل أو الموهوب من الصعب إنك تحدده".

ويضم ألبوم رامي صبري الجديد "فارق معاك"، 12 أغنية: "بتاع بنات، أنا بابا، حاول تنساني، وقلت اللي عندي، هو في كده، بقابل ناس، أنا بعترفلك، وصعبان عليا، وعجبي، وحكاية حبنا، وبتهتمي، وفارق معاك".