كلمة العدد
كل شوية يقعدوا يقولولنا "علاقة الآباء بالأبناء" و"الفجوة بين الأجيال" والكلام كتير والمشكلة إن كل اللي بيتكلموا دول دكاترة ومتخصصين ومش عارف إيه، إنما فين اللي يتكلم بصوتنا ومين اللي بيعبر عننا.
عشان كده إحنا في كلام في المفيد قررنا نتكلم بلساننا ونعبر عن نفسنا ونفكر مع بعض إزاي ممكن نقرب بين أفكار جيلنا، اللي مش معنى إنها جديدة تبقى كلها صح، وأفكار أهلنا، اللي إحنا شايفين إنها بقت محتاجة تجديد وتطوير.
و لأن إحنا بنحترم عقول بعض حاولنا نغطى الموضوع من كل ناحية من غير سطحية وسذاجة وكمان من غير تعقيد ولف ودوران.
في ساعات الواحد الدنيا بتبقى واخداه واليوم وراه يوم بس صدقوني يا جماعة مهم جداً بين كل فترة وفترة الواحد يقف مع نفسه ويبص على الفترة اللي عدت ويراجع حساباته خصوصاً مع ناس عايشين في الدنيا بس عشان يسعدوه.
يا رب الموضوع يعجبكم ومستنين تعليقاتكم وأفكاركم الجامدة جداً.
محمد مجاهد