كلمة في المفيد
الشوف الحقيقي
" وأخذ يفكر ويفكر ويفكر...ثم عاد يفكر ويفكر ويفكر...ثم ظل يفكر ويفكر ويفكر...ثم جلس يفكر ويفكر ويفكر...ثم.."
أكيد كلنا عارفين الجملة دى وبنستخدمها كتير لما نلاقى حد من صحابنا أو الناس اللي حوالينا عمال واخد وقت طويل أوى فى التفكير فى موضوع شاغل باله أو قرار متردد فيه زى هادخل كلية إيه، أشتغل الشغلانة دى ولا لأ،...وهكذا مواضيع كتير بنبقى محتارين أوى قدامها ومش عارفين إيه أنسب قرار بالنسبة لينا. بس يا ترى إحنا لما بنفكر فى موضوع من المواضيع اللى من النوع ده، هل إحنا بنفكر بالطريقة الصح اللى فعلا توصلنا لأحسن الحلول؟ وهو فى طريقة صح وطريقة غلط فى التفكير؟ الإجابة على الأسئلة دى مش سهلة ومحتاجة ناخدها واحدة واحدة كده علشان نقدر نفهمها كويس ونستوعبها.
" يتمييز الإنسان عن الحيوان بنعمة العقل التى رزقه الله إياها دون بقية المخلوقات..."
بردوا أكيد كلنا عدت علينا الجملة دى فى مواضيع القراءة اللي أخدناها فى المدرسة وإحنا فى إبتدائى وبعدين لما كبرنا شوية عرفنا إن كل المخلوقات عندها عقل إنما الفرق إنهم مش بيقدروا يفكروا ويحللوا الأحداث اللي بتحصل فى الحياة ويتعلموا بنفس قدرات العقل البشرى وده نتيجة إكتمال نمو " الفص الأمامى" فى المخ عند البشر وهو الجزء المسئول عن الذاكرة والمهارات الفنية والإبداعية وكمان هو المسؤل عن الأحاسيس مثل الحب والحزن والخوف عند الإنسان بعكس باقى المخلوقات اللى بيكون عندها المنطقة دى فى المخ صغيرة وغير مكتملة النمو فبتبقى غير قادرة على تكوين أفكار واضحة أو إتقان موهبة أو أى حاجة تتعدى مرحلة التفكير اللحظى المبنى على رد الفعل أو الغريزة. معلهش كلام علمى ملعبك شوية بس حبيت أديكوا نبذة كده عن المسئول الأول والأخير عن كل قرارتنا وأفعالنا.
"الشوف مش نظر...الشوف الحقيقى وجهة نظر"
دى جملة سمعتها وأنا بتفرج على مسرحية وجهة نظر للفنان القدير محمد صبحى وأد إيه أنا بحب الجملة دى علشان فى رأيى إنها أجمل تعريف لعملية التفكير سمعته. ما هو إحنا لازم الأول نعرف يعنى إيه تفكير علشان بعد كده نقدر نقيم هو ممكن فعلا يبقى فيه تفكير صح وتفكير غلط.
التفكير هو محاولة من العقل للتوصل إلى نتائج بناءاً على المعطيات اللى أمامه. وممكن بردوا نقول إن التفكير هو كيفية إيجاد الصلة بين اللى بيحصل حوالين الإنسان و بين كيفية ردة فعله على الموضوع ده. طبعا كلنا عارفين النظرية الفيزيائية اللي بتقول إن لكل فعل رد فعل مساوى له فى المقدار ومعاكس له فى الإتجاه..إلا فى حالة الإنسان، ممكن شخص يتعرض لنفس الموقف مرتين ويبقى رد فعله مختلف فى كل مره وإن لو شخصين مختلفين إتعرضوا لنفس الموقف فى نفس الوقت ردود أفعالهم نادر جدا لما تبقى شبه بعض. يعنى لو حبينا نلخص مفهوم التفكير نقدر نقول إنه لكل فعل يقع على الإنسان يوجد رد فعل متغير حسب شخصية هذا الإنسان وطبيعة تفكيره.
" لا يمكننا حل مشكلة بإستخدام نفس العقلية التى أنشأتها "
هكذا وصف ألبرت إينشتين رأيه فى كيفية حل المشكلات اللى بتواجهنا. بالتأكيد كلنا بنفكر وبالتأكيد مهما كان رد فعلنا فى أى موضوع سريع أو "تلقائى" فهو بردوا أساسه أفكار ومعتقدات أثرت فينا وشكلت شخصيتنا. كلنا بنفكر بس هى دايماً المشكلة اللى بتقابل الكتير منا هى إزاى نفكر أو زى ما كتير مننا بيقول بنبقى مش عارفين نبدأ منين التفكير. إزاى نفكر بطريقة (خطوات) نقدر من خلالها نبقى منطقيين ومرتبين أولوياتنا علشان نقدر نعرف إيه أنسب الحلول أو الاختيارات بالنسبة لنا. إزاى نقدر نخرج بره صعوبة الحيرة وضغط نتائج الاختيار ونفكر بطريقة مختلفة تميزنا عن غيرنا وتسمح لنا نكون سابقينهم بخطوات بس علشان عرفنا إزاى نحسن الاختيار.
" التفكير النقدى"
لو حد فيكو دخل على موقع زى "ويكيبديا" مثلا وكتب التفكير النقدى أو Critical thinking هيلاقى التعريف بمعنى التفكير النقدى وإزاى هو أكتر الطرق المنطقية والعملية والواقعية فى التفكير وهتلاقى كلام كتير عن كيفية تطبيقه فى حياتنا وإزاى نستفيد منه... خلينا ندي مثال عن طالب في أولى ثانوي وبيفكر يدخل علمي والا أدبي..... تعالي بقى نطبق معاه الخطوات الثلاثة الأساسية فى عملية التفكير النقدى عليه:
1. عرض لجميع الحقائق والحاجات اللي ليها علاقة بالموضوع اللي هو بيفكر فيه... والمرحلة دى لازم الواحد يبقى فيها حيادى جدا وأمين مع نفسه.زي مثلاً هو بيحب المواد العلمية أكتر والا الأدبية....؟ طب درجاته أعلى في إيه.... الدراسات والا العلوم والا اللغات؟ وكمان هو نفسه يدخل كلية إيه؟ وهل القسم اللي هيختاره هيقدر من خلاله يدخل الكلية اللي هو عاوزها؟ وهكذا.....
2. تانى حاجة هى عبارة عن تمرين الواحد محتاج يتعود عليه تدريجيا وهو عبارة عن إزاى أقدر أحلل الحقائق والأحداث المتعلقة بالموضوع ده وأطَلع منها كل الاحتمالات الممكنة ودى مهارة مكتسبة محتاجة كذا تجربة علشان الواحد يعرف يتقنها بعد كده..... نرجع تاني للمثال اللي إحنا ضربناه قبل كده..... هيحط صاحبنا كل المعلومات اللي جمعها قدامه ويحللها، ويشوف نسبة المواد اللي بيحبها في كل فرع أد إيه؟ وهل هيقدر ينجز ويجيب درجات أعلى في المواد اللي ما بيحبهاش في الفرع اللى هيختاره والا لأ؟ وهل هيلاقى الوقت الكافي إنه يبذل المجهود المضاعف ده مع المواد الصعبة في الفرع ده؟
3. نيجى بقى للمرحلة التالتة والأخيرة وهى مرحلة اتخاذ القرار ودى، عكس ما ناس كتير فاكرة، من أكتر المراحل اللي محتاجة تفكير وترتيب للأفكار وده لأن بمنتهى البساطة مفيش قرار مية فى المية صح وقرار مية فى المية غلط، جزء كبير من اللي بيحدد مدى صحة طريقة التفكير اللي أدت للقرار ده هى كيفية تنفيذه وتطبيقه على أرض الواقع... من أول بقى إنك تقنع الناس اللي حواليك أد إيه التفكير بتاعك ده منطقى وسليم لحد مرحلة التنفيذ الفعلى للفكرة بتاعتك..... وطبعا في المثال بتاعنا هيكون اتخاذ القرار هو اختيار لدراسته في ثانوية عامة هتكون في القسم العلمي والا الأدبي....
" عيشها بشكل تانى "
مش فاضل غير جزء بسيط مش هتلاقيه فى الكتب والمقالات المكتوبة فى الموضوع ده إلا قليل القليل، وهو أهم جزء فى الموضوع كله من وجهة نظرى بس مش بيتذكر كتير لأنه جزء صعب قياسه أو تحديد معايير ليه وهو ثقتك فى إختياراتك. كتير مننا ممكن جدا يبقى بيطبق الخطوات بتاعت التفكير النقدى ويبقى كله تمام بس مشكلته الأساسية هى مواجهة نفسه ومواجهة غيره بأفكاره وقرارته. الحياة هى مجرد تجربة كبيرة قوى كل يوم الواحد بيتعلم منها حاجة لازم نغلط علشان نتعلم، وكمان الصح والغلط دي حاجة نسبية.... يعني اللي انت شايفه صح من منظورك، غيرك ممكن يشوفه غلط من منظوره.... وانت نفسك ممكن تشوفه غلط بعد فترة.... فكر وخد قرارك ودافع عنه وتمسك بيه وتحمل مسؤليته لأنه هو ده القرار الأنسب من وجهة نظرك في اللحظة دي، طبعا ده مش معناه إنى أبقى واخد المواضيع "عِند" إنما باتناقش و بأقول أفكارى وأنا عندى ثقة إنى ما دام أنا فكرت صح وحسبتها كويس حتى لو قرارى ده مش صح من وجهة نظر غيري..... بس على الأقل هيكون خلانى أشوف الموضوع بشكل أوضح، وكمان هاكون من خلاله عرفت أتكلم مع نفسى وأواجهها وأعرف أنا عاوز إيه. وصدقونى لما نعود نفسنا على إننا نفكر صح فى المواضيع الصغيرة هنلاقى نفسنا بقينا تلقائيا بنفكر بالطريقة دى فى كل حاجة فى حياتنا....إنما ماقولتوليش إيه رأيكم... هو فعلا فى تفكير صح و تفكير غلط؟
"قد أختلف معك في الرأي ولكنني على استعداد أن أموت دفاعاً عن حقك في التعبير عن رأيك بحرية"
فولتير
محمد مجاهد