سؤال العدد
استطلاع الرأى
هل ستشارك بمبادرة في بنك المبادرات؟
" تفتكري يا علياء.. ليه الteens بيدخنوا ؟!"
دي أول جملة بدأت بيها حواري مع علياء صاحبتي وإحنا برة المدرسة وكتاب العربي في إيدها عشان تسميع النهارده..!
بصتلي بصة غريبة ، فقلتلها :
- أصل أنا عايزة أكتب مقال عن الناس اللي بيدخنوا..؟
- وإشمعنى يعني..؟!
- لا عادي.. أصل الموضوع انتشر وبقى سخيف الصراحة !
بصت حواليها وضحكت.. دايمًا فاهماني البنت دي...
- فاكرين الموضوع cool !
- إيه الـ cool في إن واحد يفضل يسحب دخان ويطلعه .. ويحرق لسانه ؟!
- مش cool بس .. لأ ورجولة كمان !
- إيه الرجولة في إن واحد يعمل حاجة من ورا أهله ؟!
- أنا عارفة..؟؟! ده جبن..!
- Uncool .. un cool.. هما مش وراهم حاجة ؟!
بصتلي وبصت لكتاب العربي في إيدها.. وقالتلي بلهجة مش مريحاني :
- عربي مثلاً ؟!
- طيب.. طيب.. اتفضلي كملي..!
***
في آخر الحصة.. اتديرت لدينا ورايا..
- دينا هم ليه البنات بيدخنوا ؟!
- أفندم ؟!
- ليه البنات اللي قدنا بيدخنوا ؟!
بصتلي كده وشكلها فهمتني غلط :
- لا يا بنتي مش قصدي إنك بتدخني !
فعلياء ضحكت ضحكة شريرة وقالت :
- وبعدين إحنا واثقين في أخلاقك..!
- اطلعي منها يا علياء.. بلاش تهدية النفوس دي...
قالتلي دينا ببساطة :
- عشان يحسوا إنهم بنات خِطرة وروشة !
شافتني بأكتب في نوتة ، فصوتت :
- يالهوي.. إنتي بتكتبي ورايا إيه ؟!
- ما تخافيش.. ما تخافيش..
- ما أخافش..؟! أخاف طبعًا .. ده إنتي حتوديني في داهية..
- إخص ! إنتي عارفة عني كده ؟!
- هه هه.. أنا عارفة عنك كده وأكتر من كده..
***
منعًا للملل.. وإني أقعد أكرر اللي قاله كل حد سألته.. الإجابات كانت عبارة عن :
- عشان يحسوا إنهم رجالة..
- Datz sooo cool!
- عشان عايزين يبقوا مقطعين السمكة وديلها ! (إحم)
- Fun..
- مشاكل نفسية ..
- عالم مضيعة..
- عشان يتقال عليهم عالم مضيعة !!
- عادي.. استكشاف..
- الواحد لازم يعمل حاجة جديدة..'cause life's so boring
دي كانت الآراء اللي جاتلي.. وطبعًا أنا رأيي مختلف وإلا ما كنتش هأكتب المقالة دي !
أولاً موضوع الfun والcool فأنا شايفة إنها حاجة في قمة التقليدية.. ومش fun أبدًا ! يعني مثلاً لو الواحد نزل بتي شيرت عليه علامة الـ no smoking و صورة نباتات... وانضم بقى للجمعيات بتاعت البيئة وكده.. دي حركة جامدة جدًا.. ويبقى إنسان- beside إنه جامد- فهو ليه قضية بيدافع عنها.. وقضية حلوة ومحترمة..
أما فكرة الاستكشاف والحياة اللي عايزين يعيشوها ويعملوا فيها مغامرات.. فكلنا عارفين إن التدخين بيعرض –لا قدر الله- للإصابة بالأمراض الفظيعة والوفاة أحياناً.. يعني ممكن التدخين يخليهم يسيبوا الحياة اللي مليااانة حاجات نفسهم يكتشفوها.. إن كانوا بيحبوا الحياة فعلاً يبقى لازم يحافظوا عليها..
النقطتين اللي قلتهم فوق دول كانوا للولاد والبنات .. فيه نقطة بقى للولاد بس : إن الرجولة هي إن الواحد ما يبعش أصحابه.. ما يعاكسش بنت في الشارع.. واللي ألفاظه محترمة وبيمسك نفسه لما يتضايق.. لكن أكييييد مش إنه يلعب بشوية نار ودخان..! مش كده برضه ؟!
يا رب أكون عرفت أقنعكم بوجهة نظري... أرجوكم بس إنكم تفكروا في الكلام ده وتقولولي عن رأيكم كمان ونقط جديدة ممكن نتكلم عنها عشان نعرف نثبت لهم إنه مش روشنة ولا حاجة.. وما حدش في صحابنا أو زمايلنا يبقى بيعمل كده.. مش دلوقت بس .. لأ دلوقت وطول عمرنا إن شاء الله..
إعداد: نورا أيمن الجندي