سؤال العدد
استطلاع الرأى
هل ستشارك بمبادرة في بنك المبادرات؟
انا موجودة في جسمك... بارويك وقت عطشك... أكلك من غيري مالوش طعم... انا اللي مشغلة مصانع بحالها... وداخله في كل شئ في حياتك... بص حواليك وشوف انت بتهدرني إزاي... ما حدش عارف لو ما حافظتش عليا إيه اللي ممكن يحصلك... يمكن كمان كام سنة تلاقي وجودي نادر.... ويمكن تمشي مئات الأمتار علشان تلاقي نقطتين مني ومش هاكون صافية زي ما أنا دلوقتي ... شفت قد ايه انت في نعمه كبيرة... أنا عارفة إنك ما تقصدش تضيعني من إيدك وعلشان كده أنا بأتكلم معاك النهارده.... علشان أقولك إزاي تحافظ عليا؟
إزاي تحافظ عليا في البيت؟
ممكن مثلا تسقي الزرع بالمية اللي غسلت بيها الخضار بدل ما ترميها في الحوض.
إتأكد إن مفيش حنفيات أو سيفونات عندك بتسرب أو بتنقط ميه. لأن الحنفية اللي بتنقط كمية تملا معلقتين في دقيقة بتهدر 60 لتر ميه في اليوم.
ما تشدش السيفون بدون داعي.... ولو مش محتاج تشد كل المية اللي في السيفون شده شدة خفيفة بالكمية اللازمة لتنظيفه فقط... وده ممكن يوفر كتير في استهلاكي.
مفيش داعي تسيب الحنفية مفتوحة وانت بتغسل سنانك أو وشك أو بتحلق دقنك وبكده تقدر توفر 20 لتر مية في كل دقيقة تقفل فيها الحنفية.
ما تستعملش الغسالة إلا لما تكون مليانة لأن تشغيلها علي كمية قليلة من الملابس بيهدر ميه كتير علي الفاضي... وفي غسالات فيها زرار بيستهلك نصف كمية المية بس في حالة ضرورة غسل كمية قليلة من الملابس.
إزاي تحافظ عليا بره البيت؟
لو عندك جنينة أو بتسقي زرع بره البيت إسقيه بدري قوي أو متأخر قوي لأن ده بيقلل كمية المية اللي بتتبخر نتيجة الحر وبالتالي الزرع بيستفيد أكتر.
رش الحدائق بالميه أفضل للزرع من ريه بالخرطوم لأنه بيساعد علي غسل أوراق الزرع وكمان بيوفر كمية كبيرة مني.
ما ترشش الشارع بالمية لأن رش المية مفيد للزرع لكن بالعكس رش الأسفلت بالمية بيكسره وكمان ما بيلطفش درجة الحرارة زي ما كتير من الناس فاكرة لأن المية دي لما بتتبخر بتزود نسبة الرطوبة في المكان وبالتالي بتزود إحساسنا بالحر.
استعمل الشوكة في تنظيف أوراق الشجر اللي بتسقط في ممرات الحدائق بدل ما تستعمل خرطوم الميه في دفعها.
لما تغسل عربيتك استعمل الجردل والفوطة وما تستعملش الخرطوم. لأن الخرطوم اللي قطره نصف بوصة مثلاً بيستهلك 10 لتر مية في الدقيقة... يعني لو غسلت عربيتك في 10 دقايق هتستهلك 100 لتر مية بينما جردل المية ممكن تحط فيه 5 لتر مية بس وتغسل العربية تمام التمام وتبقي وفرت 95 لتر. ولو عندك جنينة إغسل عربيتك بجوار الزرع علشان يستفيد من أي مية تنزل منها. بس ده لو هتغسلها بمية بس من غير أي مواد ممكن تضر الزرع ده.
ما ترميش أي مخلفات في مصادر الميه الطبيعية.
إزاي تعرف الناس طرق الحفاظ عليا؟
علم ولادك وإخواتك الصغيرين إزاي يحافظوا عليا في كل مرة يستعملوني.
في شغلك أو في مدرستك إعمل حملات توعية بأهميتي وبطريقة المحافظة عليا.
أي مكان تروحه وتلاقي فيه حنفية أو سيفون مكسور أو بيسرب إقفل محبسه وبلغ الجهة المسئولة علشان تصلحه وما تقولش دي مش مسئوليتي لأنك ما دام عرفت بقيت مسئول عن كل نقطة بتتهدر مني... ولو لقيت المسئول عن إهداري في المكان العام ده سلبي بلغ اللي أعلي منه لحد ما يحلوا المشكلة. أو أطلب رقم أو 127125 من أي تليفون وهما هيجوا ويحلوا المشكلة.
قولي يا إنسان.... مستني إيه علشان تحافظ عليا؟