الحلقة الثانية (الأخلاق وتطبيقها في تربيتنا)

زى ما اتكلمنا المره اللى فاتت عن معاملة الأهالى لأولادهم وذكرنا منها الجزء السلبى بس ، وعشان ما نبقاش بنظلم حد هنخلى كلامنا النهارده عن الايجابيات والحاجات اللى اكيد كل أب وأم بيهتموا انهم يرسخوها فى عقول أولادهم زى (الصدق- احترام الكبير- الطاعة لأولى الأمر- حب الغير -....الى اخر ذلك) واللى كلها بتتلخص داخل مسمى واحد وهو الأخلاق، يعنى إيه مش فاهمين ...؟

يعنى ببساطه الأمور اللي محدش بيختلف عليها انها صح ، الأطفال في السن الصغير وجود حافز ليهم علشان يقوموا بسلوك صحيح بيساعدهم علي إن السلوك ده يبقي ثابت عندهم، مثلا زى إننا نجيبلهم حاجة بيحبوها لو ساعدوا محتاج ولو بجزء من مصروفهم وكمان ممكن نخرجهم فى مكان بيحبوه لو عملوا موقف يدل على صدقهم، وبكده نكون بنرسخ فيهم كل شىء كويس بس على فترات وبطريقه تخليهم يتشجعوا انهم يستمروا على نفس الخط اللي ماشين فيه، وشوية بشوية الحافز المادي يبقي حافز معنوي زي الرضا والتشجيع وبعدين الطفل بمرور الوقت بيبقي الحافز موجود جواه وهو إحساسه بإنه عمل الشيء الصح.

واعتقد إن كل الناس بيعتمدوا فى تربية أولادهم على ترسيخ القيم الحميدة في عقولهم ودى حاجه محدش يقدر ينكرها .

الأهم من تربيتهم على الأسس السليمه انهم يشوفوا الأهالى كمان ماشين على نفس المنهج ومش بيعملوا عكس الحاجات اللى بيطلبوا من اولادهم يعملوها، يعنى مثلا : مش ممكن تطلب من ابنك انه يكون صادق فى كلامه وميكدبش وانت نفسك بتكدب، لأن الطفل نفسه بيكتسب تصرفاته وأسلوبه فى الكلام من الناس الأكبر سنا منه.

ودايما خلينا فاكرين اننا لو بدأنا بنفسنا هيتبعنا الأخرون فى فعلنا .

لا تلومنى على شىء فعلته أنت ... تعلمته منك وتقول لى أننى أذنبت

الإصدارات السابقة