مقالة العدد
كتير مننا بيدرسوا سواء في مدرسة أو جامعة.. وكل يوم تتجمع الشلة وتقعد تجيب في سيرة الدكتور الفلاني ولاّ المعيد العلاني.. وأكيد أكيد هتلاقي حد بيتريق برضه على الناس إللي بتذاكر وتجيب درجات عالية... "عيال دحيحه بصحيح... ده فيهم حتت واد موووووس في المذاكرة" والكلام اللي انتوا عارفينه ده..
المشكلة إنه مع الوقت احنا ابتدينا ننسى احنا بنروح المدرسة ولا بنروح الجامعة ليه.. نسينا إن كلمة تعليم بتتكوت من 4 حروف لكن علشان نوصل للهدف منها لازم نركز علي 3 حروف بس لآن الهدف من التعليم هو التعلم.... نسينا إن التعلم ده مش بس علشان أجيب درجات عالية تخليني أدخل الكلية دي ... والا أتخرج علشان أشتغل الشغلانة دي... أنا باتعلم لأن التعليم ده حقي علشان أبقي إنسان أفضل من كل النواحي... إنسان بشخصية أفضل... وأخلاق أفضل .... ومهارات تعامل مع الحياة أفضل.... وسلوك أفضل.... وحط من أفضل دي كتير جنب كل جانب من جوانب شخصيتي كمتعلم... وخلوني أضرب المثال اللي جاي ده علشان أثبت لكم صحة كلامي.
الجبر والرز الدلع.. علاقة مهمة..
فيه كذا جانب لمشكلة التعلم في مصر.. وحط 100 خط تحت كلمة التعلم دي ومتلخبطهاش بالتعليم.. لأن مشكلة التعليم في مصر اتهَرِت نقاش ومؤتمرات وقرارات للنهوض بالتعليم وبتاع..
التعلم هو نتيجة التعليم.. بمعنى إنك لما تمشي في العملية التعليمية (المفروض يعني) تطلع بمهارة تقدر تطبقها عمليًا.. هو إيه لازمة الجبر ؟! الجبر اللي كان كابوس طلبة كتير قوي في المدرسة طلع ليه فوايد مش هتصدقها.. حل المشاكل.. اتخاذ القرارات.. تطبيق الاستراتيجيات.. الخ !
خد عندك المثال ده..
واحدة بتطبخ كل يوم كبّايتين رز وبتحط عليهم معلقة ملح.. يعني لو عملناها معادلة جبرية هتبقى: 2رز = 1ملح
وفي يوم عملت عزومة وضاعفت كمية الرز في الحلة.. 2(2 رز) = 2 (1ملح)
تخيل بقى لو كانت مستخدمتش قاعدة بسيطة في الجبر وهي إننا لازم نضرب الجانبين بتوع المعادلة في اتنين مش جنب واحد بس.. كانت هتبقى: 2 (2 رز) = 1 ملح
يعني الأكل كان هيطلع دِلِع !
اللي عايزين نقوله ببساطة : إننا لو بصينا للهدف من التعليم هنتعلم، وبدل ما نحفظ شوية حاجات مش عارفين هنعمل بيها إيه، تعالوا ندور مع بعض إحنا بناخدها ليه..
لازم تدور بنفسك على فايدة من اللي بتدرسه ده وتطبقها في حياتك عشان الوقت اللي بتقضيه في الحصة أو الدرس أو المحاضرة يبقى ليه قيمة.. دور على مادة انت بتحبها ولتكن الجغرافيا مثلاً وحاول إنك تلاقيلها تطبيق عملي ومفيد وممتع في حياتك.. أبسط تطبيق إنك بدل ما تروح الملاهي في العيد تاخد صحابك وتطلعو رحلة لمكان من اللي سمعت عنهم في الجغرافيا.. المتحف الزراعي.. الواحات.. أو حتى شلالات الفيوم !
والرحلة حل من حلول كتير تقدر تطبقها علشان تستفيد من اللي بتدرسه وتستمع بيه في نفس الوقت.. ممكن تتفرج على فيلم عن وظايف أعضاء جسم الإنسان.. أو تدوّر على النت على صور للمجموعة الشمسية.. أو تتفرج على مسرحية لشكسبير.. وغيره كتير..
آن الأوان إننا نبطل نلوم اللي حطوا المناهج ونشوف الناس اللي أخدت نفس المناهج دي ومع ذلك نجحوا في الحياة.. هنلاقي إنهم كل ما تيجي سيرة التعليم مش بيقولو "يييييه.." ومش بيبصو على حرف اليه في "تعليم" أساسًا..
بيركزو بس على بقية حروف الكلمة..
شيماء بكر
داليا يونس