مقالة العدد
إعداد: داليا يونس وأميرة أبو عظمة
عن الأخت اللي في الصورة فوق..
عاوزك تبص علي رسمة البنت اللي فوق دي..
انت ممكن تتوقع حاجات كتير أوي عنها.. تتوقع إنها عندها مشاكل في إنها تلاقي هدوم مقاسها... تتوقع إنها هتقوم تجيب طبق قد ده مرتين بعد ما تخلص اللي قدامها..
بس هل تتوقع إن عندها أنيميا..؟!
قبل ما تستغرب.. هل انت عارف إيه هي الأنيميا بالظبط؟
* * *
عن الدم لما يفتقر..
الأنيميا ترجمتها العربية الحرفية هي "فقر الدم".. وفقر الدم ده معناه إن الهيموجلوبين -اللي هو الطوب الأحمر بتاع خلايا الدم الحمرا- مش لاقي حاجة أساسية من مكوناته وهي الحديد..
بمعنى.. مشكلة الأنيميا مش مشكلة "كمية" أقل زي ما ناس كتير فاكرة.. لكن مشكلة "نوع" أكل..
لو لاحظت، هتلاقي الطبق اللي في الصورة اللي فوق على قد ما هو مليان.. إلا إنه مفيهوش أي نوع أكل من اللي المفروض الشخص ياكله عشان ميجيلوش أنيميا..
ده يجرّنا لسؤال تاني مهم.. إيه هو الأكل اللي يحمينا من الأنيميا؟
* * *
عن الأخضر والإسود والأحمر..
أشهر علاج لنقص الحديد أو الأنيميا بيتوصف للناس اللي معندهاش سبب مرضي مخللي عندها أنيميا (يعني أنيما دلع أكل بس) هي أكلات ليها علاقة بالألوان.. الحاجات الخضرا (زي الجرجير والبقدونس والملوخية والخيار والسبانخ وغيرهم) والحاجات السودة أو اللي بتسوَدّ لو اتسابت في الهوا (زي العسل الأسود والتفاح) والحاجات الحمرا (زي اللحوم والكبدة) والحاجات البيضا (زي البيض واللوبيا)..
ده بالإضافة طبعًا لكبسولات الحديد اللي بتتباع في كل الصيدليات وبيوصّو بيها يوميًا للحوامل..
طب الحوامل ماشي محتاجينها لأنهم في عرض أي حاجة مفيدة عشان الطفل اللي شايلينه..
أنا بقى محتاج حديد ليه؟
***
عن الدوخة وتمن الرّوج اللي ممكن توفيره..
خدها قاعدة ببساطة.. حديد أقل = هيموجلوبين أقل = أوكسوجين أقل لخلايا الجسم المختلفة..
فلو نسبة الحديد قلّت في دمك.. معنى كدة إن "جودة" دمك هتقل.. فالدم اللي هيروح لمخك مثلاً مش هيبقى بالجودة الكافية إنه يخلليه يؤدي وظايفه صح.. فتلاقي نفسك بتدوخ من أقل مجهود.. ومتعرفش تركز أوي.. وتلاقي كمان لونك اصفرّ وشفايفك بقى لونها باهت..
ويمكن عشان نسبة الأنيميا عند البنات عالية شوية (عشان الدم اللي بيفقدوه في الدورة الشهرية) والبنات من نص المجتمع اللي بيهتم بجماله زيادة حبتين تلاقي مبيعات الرّوج عالية أوي! في حين إنهم ببساطة ممكن يستغنو عن الرّوج أو الروجاجوه (البتاع اللي بيحمّر الخدود ده) بطبق سلاطة خضرا "أخضر" زيادة عن الطبيعي بس!
* * *
عن الأسود الخاين ..
قلنا من ييجي فقرتين فاتو إن الحاجات السودة زي العسل الأسود والكبدة من مصادر الحديد الجامدة..
يمكن فيه حاجة "سودة" -أو غامقة للدقة اللونية- بتكسر القاعدة دي.. وهي الشاي..
الشاي فيه مادة شريرة كدة امسها حمض التانيك.. حمض التانيك ده بيتفاعل مع الحديد ويمنع امتصاصه من الجسم.. فيخللي كل الحديد اللي انتا كلته في الأكل ده ولا كإنه دخل الجسم أساسًا..
بالمناسبة، اللي شغله عكس الشاي بقى اللمون.. لأن فيتامين سي اللي جوا اللمون بيساعد على امتصاص الحديد..
عشان كدة من ضمن العادات الغذائية الغلط اللي لازم تخللي بالك منها إنك تشرب الشاي على طول بعد الأكل.. لازم عالأقل تستنى ساعة أو ساعة ونص عشان تسمح للحديد اللي في جسمك إنه يُمتص.. بعد كدة اشرب شاي زي مانتا عايز وحط في بطنك حديدة صيفي..
* * *
عن السَمنة والسِمنة ..
يعني إيه السِمنة؟ الواحد بيزيد في الوزن لما بياكل اكتر مابيتحرك. السِمنة مش يعني واحد تخين، السِمنة يعني واحد تُخنه مأثر بطريقة سيئة جداً على صحته وحياته بشكل عام. السِمنة تعتبر مرض وممكن الناس تتعالج منه. الواحد السمين في الغالب بيبقى كده علشان اكله كمان مليان دهون زي السَمنة والنشويات. محدش هيبقى سمين لو أكل كميات معقولة من كل حاجة.
* * *
عن الطول في العرض ..
طيب، إزاي أعرف لو أنا سمين ولا تخين ولا إيه؟ بسيطة! حنقولوكم على الطريقة اللي الدكاترة بيستعملوها.
معاك ورقة وقلم؟
وزنك (كج) ÷ (طولك بالمتر)²
من الرقم اللي طلع حنعرف إيه حكايتك.
15- 18.5: انت تحت الوزن الطبيعي
18.5- 25: انت عادي وفالتمام
25- 30: انت فوق الوزن العادي، حاول تلحق نفسك
30- وانت طالع: السِمنة
* * *
عن الضغط والقلب
مشاكل كتيرة وخطيرة بتيجي للناس السمينة زي
- السكر
- الاكتئاب
- ضغط عالِ
- كولسترول عالِ
- دهون على الكبد
- حصوة في المرارة
- بالنسبة للبنات: تكييس على المبيضين
- حساسية وأزمة
- روماتزم والتهاب في المفاصل
- مشاكل في عظمة الحوض والرجل
- مشاكل في التنفس وانتا نايم
كفاية؟
حتتغدى إيه النهاردة؟
* * *
* * *
مصادر:
وهبة، ممدوح. صحتك في طعامك. مشروع تحسين، القاهرة: 2005
United States Department of Agriculture, My Pyramid.gov, http://www.mypyramid.gov
Nemours Foundation, KidsHealth, http://www.kidshealth.org
انت إيه رأيك..؟
شايف الأنيميا والسِمنة ممكن الواحد منا يتحكم فيهم؟