مقالة العدد
عمر يدخل فراشة لينام .... صوت حنفية تنقط بإيقاع بطيء... تبدأ عيون عمر في التثاقل.... يتثائب ويغلق عينيه... وفجأة..
ميما: عمر..عمر..يا عمر
ينتبه عمر للصوت الذي يناديه فيصحو من نومه..
عمر:مين؟!
ميما: أنا ميما...مش فاكرنى؟
عمر:ميما! ميما مين؟ آه بطلة نهر النيل العظيمة بتاعت مسرحية المدرسة..
إنت جيتى إزاى؟ وعاوزة ايه؟ اناعاوز أنام.
ميما بنبرة صوت حزينة جدا:وجايلك نوم وأنت سايب الحنفية تنقط...
وسامع كل نقطة من صحابي نازلة فى الحوض وطنشت...إهي إهي
عمر:ما تكبريش الموضوع قوى كدا...
هوا أنا سبتها مفتوحه دي بتنقط بس والمرة الجاية هقفلها كويس.
ميما:أنت عارف الكام نقطة دول بيبقو قد إيه مع بعض...
أنت عارف قيمة كل نقطة إية؟
قوم إقفل الحنفية كويس يا عمر من فضلك.
يقوم عمر إلي الحمام ويغلق الحنفية بإحكام فيتوقف صوت قطرات الماء.
ويعود ليكمل كلامه مع ميما.
عمر:يا ميما إحنا فى مصر وعندنا النيل.... يعني الكام نقطة دول مش هيفرقوا...
ميما:وما سمعتش عن تحديد حصة كل فرد من ميه النيل المتوقع توصل
النص سنه 2025.
عمر:إيه؟! يعنى إيه؟ مش فاهم كلامك... شكلك كده مثقفة...
قولى لي تاني كده عشان أكتب اللي هتقوليه فى فقرة هل تعلم...
أصل أنا اللى هأقدمها فى إذاعة المدرسة بكرة.
ميما:يعنى مش هنقدر نستخدم نفس كمية الميه اللى بنستخدمها دلوقتى
دا غير إن عدد الناس كمان هيكون أكتر.
عمر: أخ...دى هتبقى مشكلة فظيعة...
ميما: طبعا... ومش بس كدا إحنا لما نحافظ على الميه ونستخدمها فى حدود إحتياجنا الأساسى وبس ده هيقلل تكاليف إنتاجها وكمان هيقلل تكاليف جمع ومعالجة الصرف الصحي.وبكده هنقدر نحافظ عليها لأجيال جاية.
عمر: يااه يا ميما...الموضوع طلع كبير قوى...دا إنت طلعتى شايله هموم الدنيا...وبرغم إنك داخله فى كل حاجة فى حياتنا إلا إننا مش عارفين قيمتك كويس.... إعتبرينا من النهارده أصحاب وأنا مستعد أساعدك فى أى حاجة.
ميما:أنا متشكرة قوى يا عمر بس تفتكر إنت لوحدك هتقدر تعمل ايه؟
أنا وكل صحابي نقط الميه عندنا مشاكل كتير والناس بتتعامل معانا بإستهتار فظيع.... ما حدش بيهتم بينا ما حدش بيصلح الحنفيات اللي بتنقط....
واللى بيغسل العربية بالخرطوم ما يعرفش قد ايه الميه اللى بتروح من غير فايدة دي مهمة... مع إنى أهم حاجة موجودة فى حياة الإنسان....
وكفاية إنه لما يغسل إيده بأحميه من أمراض كتير.....
تعرف إن غسل الايدين بالصابون اكتر من 10 مرات بيقلل الأصابه بالالتهابات الرئوية الحادة بنسبة 23 %.
عمر:مش بأقولك مثقفة...شوفى... أوعدك أنى أساعدك علي قد ما أقدر...
أنا حسيت دلوقتى قد ايه موضوع أننا نستخدم الميه بطريقة معقولة هتفرق معانا كتير.... وهأقول اللي أنا اتعلمته منك لكل زمايلي في الإذاعة بكرة....
يللا بقي كمليلى فقرة هل تعلم ...بس باللغة العربية لو سمحتى يا ميما.
يتناول عمر ورقة وقلم ويستعد للكتابة
ميما: أوكى يا عمر... أكتب... هل تعلم....
أن 5 دقائق من الاستحمام تستهلك فى المتوسط من 57 – 95 لترا من المياه.
أن 7.6 – 26.6 لترا من المياه تستخدم فقط لتدفق المرحاض
أن11–19 لترا من المياه تضيع هباءا عندما تترك المياه جارية و انت تقوم بغسيل اسنانك.
أن دقيقة واحدة من رش الحدائق او الشوارع تستهلك من 10 – 20 لترا من المياه.
أن60 لترا/الساعة من مياه الشرب تفقد من التسربات الموجودة فى دورات المياه.
عمر: متشكر يا ميما على المعلومات المهمة دي وعايز أشوفك على طول...
وما تزعليش مننا أوعدك أننا هنحافظ على كل نقطة ميه من النهاردة لأننا عرفنا قيمتك كويس.
ميما:شكرا يا عمر... تصبح علي خير
عمر: وانتي دايما بخير يا ميما
يضع عمر رأسه علي وسادته وهو يتمتم بما سيقوله في الإذاعة غدا... ثم يدخل في النوم وعلي شفتيه ظل إبتسامة سعيدة...