مقالة العدد
كل شوية فيه مرض يظهر على الساحة ويشغل بال الناس.. ومش محتاجين نقول إن انفلوانزا الخنازير هي أكتر موضوع الناس بتتكلم فيه وبتدور عليه عالنت.. وبتخاف منه طبعًا! ومن باب "الوقاية خير من العلاج" وإن الواحد لازم يعمل احتياطاته برده من قبل ما المرض يوصل.. دخلنا على موقع منظمة الصحة العالمية – الـWHO يعني- وشفنا بيوصّوا بإيه وبيحذروا من إيه..
خللينا نحط الموضوع في صورة أسئلة شايعة يمكن بتدور في بالك أو بتسمعها..
- بالنسبة لموضوع القناع ده.. هو لازم ؟
والله هما بيقولو لأ، الأقنعة دي يلبسها الشخص المريض بس أو اللي بيعتني بيه.
- طيب بالنسبة للمواصلات والتجمعات؟
هو بشكل عام هيبقى صعب إنك تتجنب أي تجمعات خصوصاً في بلد زحمة زي بلدنا، لكن حاول بعد كل مرة تركب فيها مواصلات أو تقعد في حتة زحمة إنك تغسل إيديك كويس بالمية والصابون.
- أخويا جاتله انفلوانزا دلوقتي.. أسيب البيت ولا أعمل إيه ؟
بص هو مفيش حد يقدر يقول إن حد جاله انفلوانزا الخنازير100% إلا إذا اتعمل له تحاليل، وطبعًا مش أي واحد يجيله برد اليومين دول يبقى أكيد عنده انفلوانزا الخنازير لأن فيروس الانفلوانزا نفسه ليه كذا نوع منه انفلوانزا الطيور وانفلوانزا إتش 1 إن 1 (اللي بيسموها الخنازير) والانفلوانزا اللي احنا متعودين عليها بتاعة كل سنة.
- طيب أتصرف معاه إزاي ده ؟ آخده أحلل له على طول ؟
لأ.. لو حد جاله أنفلونزا أحسن حاجة إن احنا ناخده لدكتور وهو اللي يحدد نوع الأنفلونزا وينصحك تعمل إيه ولو عاوز تتاكد ممكن تطلب 105، وعلي العموم حاول على قد ما تقدر إن المريض ده ما يخرجش بره البيت ويخالط الناس، كمان يشرب سوايل كتير والأوضة اللي قاعد فيها تتهوى كويس.. ومش محتاجين نقول محدش يقرب منه أكتر من متر علشان ما يتعديش.
داليا يونس
قم بتحميل لعبة السلم و الثعبان التعليميه...اضغط هنا