10 تعليقات لشلبي في السوبر.. "الزلموكة وسيب شعري واوعى وشك"

القاهرة- (مصراوي):

قال الإعلامي مدحت شلبي تعليقات طريفة أثناء تعليقه على مباراة السوبر المصري بين الأهلي والمصري البورسعيدي، الذي حسمه الأهلي للمرة العاشرة.

ويستعرض مصراوي 10 تعليقات طريقة لشلبي عن المباراة:

قال شلبي تعليقا على فرصة للمصري بالدقيقة 13: "لو كان كريم العراقي حرك الزلموكة شمال أو يمين كانت الكورة زغرطت جوة الشبكة".

وعن فرصة أزارو بعدما فشل في تحويل عرضية برأسه إلى شباك المصري بالدقيقة 27: "ده انت بتسرح شعرك بالكرة يا راجل".

وبعد التحام عبدالله السعيد مع فريد شوقي بالدقيقة 28، قال شلبي: "بيقوله سيب شعري ده انا لسه مسرحه.. سيب شعري ده أنا لسه عامله بالشامبو".

وعن الحضور الجماهيري: "واحد بيقول للتاني انا هكسبكم النهاردة، يرد عليه لا ده إحنا اللي هنقطعكوا يا حبيبي.. ليه لازم نطلع أنياب ونطلع مناظر ملهاش معنى، الابتسامة بتحرك 44 عضلة في وشك لكن التكشيرة بتخلص على وشك ووش اللي قدامك واوعى وشك.. وادي تيشرت أحمر جوة جماهير المصري، يا ترى معندكش قميص المصري ولا إيه".

وبعدما شتت محمد الشناوي حارس الأهلي الكرة إلى خارج الملعب قبل نهاية الشوط الأول: "كرة القدم ثقة، إديني ثقة وسيبني أعوم أعديك".

وعن لقطة المشجع الأهلاوي الذي ارتدي قبعة: "لابس طربوش، لكن الطرابيش خلصت من زمان يا أفاندي، من أيام الأفندي والباشا".

وأثناء المباراة قال: "الأهلي والمصري بيتنافسوا على كاس ميشربوش الا واحد، لا يقبل القسمة على اتنين".

وأضاف: "لاعب المصري عايزه يحطه على كتافة وياخده على الأرض والحكم يعد تلاتة، عبدالموجود موجود آه، بس مش للدرجة دي".

وتابع: "طول ما لياقتك معاك عضلتك تحت امرك تقولك شبيك لبيك.. لو مش معاك تقولها تعالي يمين تروح شمال، تقولها شمال تطلع أوت".

وكانت آخر تعليقاته الطريفة: "أنا سامع صوت حسام حسن من الامارات داخل فى ودنى هنا فى القاهرة.. وادي الكاميرا الاسبايدر جت اهيه".