إعلان

تفتكروا ليه..؟!

نهاد صبيح

تفتكروا ليه..؟!

نهاد صبيح
09:00 م الخميس 08 نوفمبر 2018

جميع الآراء المنشورة تعبر فقط عن رأى كاتبها، وليست بالضرورة تعبر عن رأى الموقع

الولاد هما قرة عنينا وامتدادنا في الحياة، لكن رغم حبنا لهم يعز علينا نطلب منهم حاجة، من كام سنة كدا وتحديدا بعد ما ابني الكبير اتعلم السواقة، قلت لنفسي ليه أنا كمان ما أتعلمش وأسوق بدل ما أفضل كل شوية أقول له يوصلني هنا ولا هنا .

وبعد إلحاح شديد علي زوجي واللي مقتنع تماما إن لو ستات العالم كله ساقوا أنا مش هسوق، وافق، وافق تحت ضغط مني وكمان من ابني اللي طمنه إنه هيكون دايما معايا لو في أي مشكلة .

وبدأت الدروس مع معلم قيادة زوجي اختاره بدقة شديدة وكانت أهم مواصفاته إنه مدرك يعني إيه ست في الأربعين بتتعلم لأول مرة .

الصراحة الراجل كان صبور جدا ومع الأيام وجدت إن دروس التدريب مش بس مهمة في تعليم السواقة لأ دي مهمة جدا في الحياة كلها. زي مثلا ....

العربية جاهزة

قبل ما نمشي لازم نتأكد إن العربية جاهزة يعني نطمن على البنزين والزيت والميه والدرس دا مهم جدا، مهم إننا قبل ما نبدأ حياة جديدة لازم نتأكد إن عندنا اللي نقدر نبدأ بيه.

اربط الحزام

حزام الأمان اللي معظمنا شايف إنه مقيد وملوش لازمة ونادرا ما حد بيستعمله، مش مجرد رابطة في الكرسي وخلاص لأ دا أمان في الحركة المفاجأة وقت الحادثة لا قدر الله يقلل الخساير والدرس دا معناه إن الإنسان ما يستهترش بعمره.

سيب مسافة أمان

وأنا بتدرب مكنتش ببقي واخدة بالي إني المفروض أبعد شوية عن العربية اللي أدامي يعني أسيب مسافة أمان، المسافة دي في منتهي الخطورة والأهمية وخصوصا لما تفكر فيها لحياتك كلها، لأن كتير مننا ما بيهتمش إن يسيب مسافة بينه وبين الطرف التاني في أي علاقة من العلاقات الإنسانية، زي الصداقة، زمالة العمل، الحب، الجيرة، وغيرها من العلاقات البعيدة عن الرحم .

مكنتش أتخيل أبدًا إن مسافة الأمان دي واللي ممكن تنجي السواق والعربية سوا هي برضوا اللي بتنجح العلاقات الإنسانية، البعد لمسافة مش بس يأمنك من أنك ماتخبطش اللي أدامك لأ دا بيخليك تشوف أوضح وأحسن وكمان بيخليك تشوف من كل الجوانب مش من جنب واحد بس .

وجود المسافة دي هو اللي بيسمح لك بحركة معتدلة صعودًا بزيادة العلاقة أو هبوطًا، بتراجع بسيط أو حتي خروج آمن بأقل الخساير.

الدروس كانت كتيرة ومفيدة جدا والحمد لله خلصت فترة التدريب على خير وبدون أي حوادث لكن الغريب إني ما سوقتش أبدا واللي أغرب من كدا إن المدرب اللي دربني ساب تدريب القيادة وفتح مشروع لتدريب الحيوانات الأليفة!... تفتكروا ليه؟!

دمتم في أمان الله

إعلان