إعلان

السابلاي ليست وعلم فرقعة "البالونة"!

السابلاي ليست وعلم فرقعة "البالونة"!

بسمة السباعي
09:00 م السبت 09 سبتمبر 2017

جميع الآراء المنشورة تعبر فقط عن رأى كاتبها، وليست بالضرورة تعبر عن رأى الموقع

بسمة السباعي

الحقيقة إن الواحد تعب وقرف من المدارس اللي أحوالها بقت عجيبة حبتين تلاتة!

يعني السابلاي ليست اللي بيبعتوها مليانة طلبات غريبة مبهمة محتاجة خبير إستراتيجي يفك شفراتها ومحتاجة قرض من البنك عشان نشتريها والاعداد الخزعبلية اللي بيكتبوها قاصدين بيها ايه!

بيطلبوا ١٨ براية ليه! طب ٢٠ أستيكة ليه هتمسحوا بيها الماضي! طب ٦ كراتين أقلام رصاص ليه!

خير والله؟!

يعني الطلبات بالأعداد دية كلهاااااا ليه! مش فاهمة والله!

ما كل طفل يروح بمقلمته فيها قلمه واستيكتة وبراية وألوانه وشكراً!

لا ازاي لازم ندفع ونغرم!

وياريتها بتيجي على قد السابلاي ليست ونخلص!

دة غير بقى النوتس اللي طول السنة بيبعتوها هارينا دفع

رحلة "ادفع"

هنعلم الولد فن الزراعة "ادفع"

ديش بارتي "أبعت ٢٦ قطعة كاب كيك من نولا" يعني ادفع بس بطريقة شيك!

صورة للطفل وهو بيتّاوب "ادفع"

صورة للأطفال وهما لابسين اليونيفورم كامل (اللي انت اصلا دافع فيه قد كدة) "ادفع"

هنحتفل بيوم البتنجان العالمي "ادفع"

هنجيب بلالين ونفرقعها عشان نعلم الطفل علم "الفرقعة" والمدرسة هتتكفل بتمن البلالين متقلقش بس حضرتك "ادفع تمن الدبوس" وما ادراك ما تمن الدبوس في المدارس الإنترناشيونال!

وهكذا من ادفع ادفع ادفع

ارحمونا وزقوا السنة معانا الله يكرمكوا!

احنا يادوب مجمعين المصاريف بالعافية يا أفاضل فالرحمة حلوة!

إعلان