"بقالي 7 سنين في الشغلانة دي".. السيسي يتحدث عن تأخر تنفيذ المشروعات

كتب- يوسف عفيفي:

علق الرئيس عبدالفتاح السيسي، على أسعار الطاقة "غاز وكهرباء"، وقال مخاطبا أحد المستثمرين المشاركين في الملتقى والمعرض الأول للصناعة :"مبقاش عندنا وقت نضيعه في الدراسات بالنسبة للموضوعات المحسومة، ومفيش حد هيديك أسعار طاقة أرخص من اللي بتاخدها في مصر، ولو سعرت الكهرباء على التسعير الحقيقي، ممكن يتضرب الرقم اللي بيتدفع النهاردة 5 مرات، وده مش هيحصل، لإننا حريصين على الاستقرار ولكن انتوا بتضيعوا وقت كتير جدا، وأتصور إن التحدي بيولد فرصة مش عقبة".

وقال السيسي، خلال الملتقى والمعرض الأول للصناعة، اليوم السبت: في كتير من الأنشطة اللي بتتعمل بتبقى محتاجة دراسات، لكن فيه حاجات كتير باينة جدا، زي موضوع الخامات الدوائية، والمعدات اللي بنجيبها، لما بنتكلم على طلبات لغاية 80 طن، حياة كريمة هيتصرف عليها تريليون جنيه، يعني فيه صيانة، محدش يبقى قلقان إن المنتج اللي معاه هيبقى فيه مشكلة.

وتابع الرئيس: بقول لكل الناس، يا جماعة، بيقولولي 100 مليار دولار صادرات بعد 5 سنين، كده بعيد أوي، أنا بتكلم بجد، 3 شهور بندرس وبعدين تمويل، نبص نلاقي المشروع بدأ بعد سنتين، أنا بكلمك، أنا بقالي 7 سنين في الشغلانة دي، عارف المواضيع دي بتتأخر وبتضيع لنا فرصة.

وينظم الملتقى والمعرض الدولي الأول للصناعة، اتحاد الصناعات المصرية في مركز المنارة للمؤتمرات وذلك بمناسبة مرور 100 عام على تأسيس الاتحاد.

ويشمل المعرض الذي يقام تحت رعاية الرئيس السيسي، عددًا من الأجنحة الضخمة للصناعات المتنوعة، وعلى رأسها قطاع الصناعات الهندسية وصناعة الآلات والمعدات والماكينات.​