"لك في ميسي عبرة".. عمرو أديب معلقًا على تصريحات أبو تريكة لمحمد صلاح

كتب- محمد خميس:

انتقد الإعلامي عمرو أديب، نجم المنتخب الوطني والنادي الأهلي السابق محمد أبو تريكة، بسبب تصريحاته حول إبقاء المدير الفني لنادي ليفربول الإنجليزي يورجن كلوب لمحمد صلاح على دكة البدلاء أمام كريستال بالاس، قائلًا: "أبو تريكة بيقول محمد صلاح نجم ودي مش معاملة النجوم وإزاي كلوب يعامله كده".

وأضاف "أديب" في خلال تقديمه لبرنامجه "الحكاية" على فضائية "إم بي سي مصر" اليوم الأحد: "لما الكلام دا يجي من أبو تريكة لمحمد صلاح، وأنا مش بفهم في الكورة زي أبوتريكة، وأنا مش شايف أن أبو تريكة كمحلل رياضي هو في مستواه كلاعب كرة، جوا بي إن سبورت في ناس أحسن منه كتير، وائل جمعة بالنسبة لي في التحليل أحسن منه كتير وطارق الجلاهمة، وأنا مش بتكلم في الكورة لكني بتكلم في البني آدمين".

وتابع: "صلاح بقى نجم مع مين مش كان مع مدربه يورجن كلوب، وفريقه ليفربول" موضحًا: "مفيش حد ليه فضل على حد الفريق له فضل ومحمد صلاح له فضل ولكن مفيش حد يختلف على مدرب زي كلوب أبدًا، والمدرب في أوقات كتير هو أب، ومحمد صلاح كبير ولكن هو شاب ومينفعش نخليه ياخد موقف من فرقته اللي كبرته والمدرب اللي ساعده على النجومية".

وأردف "أديب": "أنا بقوله يا محمد صلاح إنت في الفرقة الصح، أنت في ليفربول والفرق الإنجليزية متفوقة على الإسبانية والألمانية، والناس في إنجلترا بتعشق محمد صلاح وهو رمز بالنسبة لهم".، موجهًا رسالة لأبو تريكة، قائلًا: "أنا بختلف معاك في الرأي والطريقة المصري دي متنفعش وجايز في شيء منعرفوش ومحمد صلاح محترف يجلس على دكة البدلاء أو يلعب هذا قرار المدرب، وأكتر واحد اقتنع بصلاح وسنده ووضعه في المكان الصحيح هو كلوب.. بقى كلوب مش عارف قيمة محمد صلاح.. ياريت يا أبو تريكة تقول له إن لسه قدامه عمر ومستقبل ومينفعش أقوله إنت النجم الأوحد ولكن جانبه نجوم زي ساديو ماني وفرمينيو ونجوم تانيين".

واختتم "أديب" رسالته لأبو تريكة: "مش عايزين صلاح يبقى كاره فرقته وغضبان من ليفربول والمدرب.. مش عايز محمد صلاح يوصل لحالة ميسي دلوقتي وكرهه لتواجده في برشلونة.. الراجل نزله بعد 5/0.. صلاح لو سمحت العقل زينة وفضل ليفربول وكلوب مينفعش ننساهم ولك في ميسي نموذج وعبرة".