ehabfarok
5

تقييم الكاتب:5

ehabfarok

تقييم الكاتب :5

بتاريخ : 12/01/2012 11:48:00 م- المشاهدات : 22995

صور مسخرة للعرسان ليلة الدخلة,بالذمة فى كده!!

صور مسخرة للعرسان ليلة الدخلة,بالذمة فى كده!!

اسم السلسلة: رايحين على فين

النهاردة الخميس,والليلة ليلة الجمعة,وهى الليلة التى تُقام فيها,معظم الأفراح فى مصر,وكذلك فى العالم العربى,ولا أدرى ماهو السبب فى ذلك,وهل إقامة الأفراح لا تجوز,فى الأيام الأخرى,خصوصاً أنه لم تصدر فتوى بحرمانية ذلك حتى الآن,والشيخ محمود عامر"بتاع اهدار الدم" جاهز بفتاويه لأى طوارىء,ولكن هناك أفراح تتم فعلاً فى أيام أخرى,خصوصاً أيام الأعياد,وزحمة الصالات والنوادى,وبعيداً عن أن هؤلاء ناس فرنجة,وأغلبهم بيعمل أفراحه أمريكانى,فى الجناين وفى عز الظهر,ولكن يبقى يوم الخميس هو المسيطر,من أيام عماد حمدى,لما كان بيقول يا نينة,وحتى زمن البت بتاعة سباركل,ما أمها بتقولها"الحمام يا منى",والموضوع "ماشى ماشى"!!

جايز لأن بكرة الجمعة أجازة"لأ مش عشان الحلاقين فاتحين يا ناصح",لكن عشان ممكن نصحى متأخر شوية,بعد تعب فرح ليلة امبارح,واللى الكل شبع فيه رقص,وختم طبعاً بالعشوة اللى هيا,اللى كتمت على مراوح المعازيم كلهم,ويا ريت كان بيعجب,رغم إن العريس دفع فى الليلة دم قلبه,وهيقعد كام سنة يسدد فى تكاليف الفرح بس,وكمان بيتهد هيله,سواء فى أول الليلة,وطبعاً فى آخرها,عشان كدة بسلامته,بيتأخر قوى فى النوم,وساعات بيطنش وما يروحش يصلى الجمعة!!

عريس بقى ومايصحاش,غير على تخبيط الست حماته,اللى عايزة تتطمن وتطمن العيلة وعيلة العيلة,لحد ما يفتحلها بسلامته الباب,وهوا مغمض عين ومفتح التانية,وبيهرش فى شعره كمان,قال يعنى كان نايم وباله مرتاح,ويقولها وكله سعادة,والفرحة هتبظ من عينيه,منورة يا حماتى اتفضلى,وما أن يغلق الباب ويلتفت حتى يكتشف اختفائها من ورائه ,وقد طارت فى لمح البصر,على بنتها توشوشها فى المطبخ,قال يعنى بيعملوا للعريس فطار,وربنا عالم بقى هيفطر,واللا هيسيب البيت على لحم بطنه!!

وتُعد هذه الليلة,هى أطول ليلة,فى حياة أى شاب,إذ أحياناً تمتد لأكثر من 36 ساعة,فمن صباح اليوم الموعود,ورغم تعدد الأصدقاء الذين عملوا له أحلى واجب,لكن العريس بسلامته مقضيها مشاوير,ولو كان جمل كان اتهد ووقع من طوله,لكن لازم يتمم على كل شىء بنفسه,حتى لا تظهر مفاجآت على آخر وقت,والمرسيدس اللى هتزفه,تتأخر وتختم بعربية لانوس واللا أكسنت,وما بين بتوع القاعة,لفرقة المشاعل اللى هتعزفله السلام الوطنى,وبسم الله الرحمن الرحيم هنبتدى الليلة,للحلاق اللى هيظبته ويعدله السكسوكة,للكوافير اللى هيظبط العروسة,لدرجة أنه مش هيعرفها أساساً,لا يوم الفرح,ولايوم الصباحية طبعاً,بعد الميك آب ما يتغسل,ويبان المستخبى,للمصور اللى هيعمل الفيديو بتاع الفرح,للإستديو اللى هيصور ألبوم صور ليلة العمر,وهنا مربط الفرس,وبمناسبة الفرس,فى ناس بتجيب حصنة والله,وتتصور بيها ولا كبير الدهاشنة,وجواز وائل من ماهيتاب باطل!!

وعن التصوير ليلة الفرح حدث ولا حرج,والعملية بتبزوط عالآخر,فبعد ألبوم الخطوبة,وكل بنت طبعاً لها تلات أربع البومات,دا حتى فى خطوبات بتتفشكل ساعة التصوير,المهم بيحاولوا يطوروا شوية ,فى ألبوم الفرح,بعد العملية مازاطط طبعاً,وبقت حلالى بلالى,وكل واحد يحط لسانه فى بقه!!

وواضح فى الصور,آخر تقاليع التصوير ليلة الدخلة,فى الألبوم الذى سيظل للأجيال القادمة,دا لو عاشت الجوازة الميمونة,أكثر من سنة طبعاً,بعد العروسة ما تطلع ما بتعرفش تسلق بيضة,وبسلامته طبعاً يطلع ما بيعرفش ؟؟,يعاملها بحنية يعنى!!

صورة رقم (1)
دا طبعاً كان الفرح الشهير ,فى ميدان التحرير,ورغم أن الصورة وطنية جداً,وجنب دبابة كمان,لكن بتنشن عليك ببندقة يا حضرة العريس,طب دا قدام الناس,يا خوفى يا بدران,لتكون البندقية معمرة,ويكون العشا الليلة آخر عشا!!

صورة رقم(2)
الباشا ماكفاهوش البمب والصواريخ اللى اضربت فى الفرح,راح ضارب هوا شمروخ,من شماريخ الألتراس,بس دا بقى واد خبيث بجد,عايز الدخلة تكون من غير جمهور,مع إن البلوتوث بقى فى كل حتة!!

صورة رقم(3)
أقول إيه بس على الصورة دى,ربنا يكسفك بجد,دا منظر تظهر بيه,ولو العريس أهبل ومش فاهم,المصور ماقالوش حاجة,بلاش المصور,الناس اللى معاهم فى الإستديو,على كل حال أنا خبيت وشه,وكمان خبيت وش المدام,وربنا يستر على ولايانا,ورجالتهم ولا مؤاخذة!!

صورة رقم (4)
لا مؤاخذة دا مش فرح,ولا ليلة دخلة,لكن بلدينا حب يتصور معاها,ربنا يخليهاله,ويمكن عنده حق,مهى المواشى كلها منافع,على الأقل بتجيب فلوس,مش بس حرقة دم عالفاضى,مع البنى آدمين ؟؟ لامؤاخذة!!

وأخيراً نتمنى للجميع ليلة سعيدة,لمن سيتزوج فيها,ومن تزوج فعلاً,أما من لم يتزوج حتى الآن,فنتمنى له التوفيق,وأن يهتدى لنصفه الثانى,ويكمل نصف دينه,وأن يحرص على عقله أن يطير,مع نفقات المانيكير والبادى كير,أما بخصوص التاتووو,فذنب اللى عايزة على جنبوووو,وهوا اللى جابه لنفسوووو!!

أرجو ان أكون قد أدخلت عليكم بعض البهجة,وألف مبروك,لولولولولولولى,دى مش من عندى طبعاً,دى من الفرح اللى جنبنا!!

المصدر: ايهاب فاروق

اسم السلسلة: رايحين على فين

موقع مصراوي غير مسئول بأي شكل من الأشكال عن المحتوى المنشور بالاعلى او مصدره او صحته وتقع كافة المسئوليات الأدبية والقانونية على عاتق المشترك بمقتضى اشتراكه.

تقييم:

مستخدم قيم هذه المقالة


مقالات اخرى لنفس الكاتب

تصنيف بــ :

التعليقات

اضف تعليق

رتب التعليقات

التعليقات

(0) تعليق
الصفحة

أحدث الصور

أحدث الفيديوهات

الآن يمكنك إنشاء حساب جديد للدخول على كتابات بإستخدام حسابك على الفيس بوك.

مساحة إعلانية

أكثر الكلمات بحثا

مقالات متعلقة

أكثر المقالات

افضل الكتاب