مي كساب عن عيد الحب "الحب مش دبدوب ولا حتة شيكولاتة"

كتبت – منال الجيوشي:

نشرت الفنانة مي كساب، عبر صفحتها الشخصية بموقع انستجرام، صورة احتفالا بعيد الحب، وعبرت من خلالها ببعض الكلمات التي قيلت عن هذه المناسبة.

وعلقت "مي" قائلة "أنا وفالانتين حالة في منتهى السخرية، على فكرة الحب عمره ما كان دبدوب، ولا حتة شيكولاتة، ولا قلب أحمر قطيفة، أو بالونة على شكل قلب منفوخ بغاز يخليها لو سبتها من إيدك تطير لفوق ولا عمرك تاني تلاقيها".

وتابعت "الحب اللي أنا أعرفه يا ابني مش بس موقف، ده مواقف وحياة، كلمة حق تتقال في وقت الشدة من غير ما نخاف، راجل في ضهر ست محتاجة له، أو حتى لو مش محتاجة له، يحميها وعمره ما يجور عليها، وعمرها في ضله ما تخاف، وابن جدع يشيل أمه ويمد إيده ليها، كل عيد حب وكل اللي بيعرفوا يحبوا بجد طيبين".

واختتمت كلامها قائلة "ملحوظة بس، كل الكلام ده ما يمنعش برضو إنك تجيب هدية حلوة لمراتك".

يذكر أن مي كساب شاركت مؤخرا في بطولة فيلم "طلق صناعي"، والذي يعرض حاليا بالسينمات، وشاركها البطولة ماجد الكدواني، حورية فرغلي، مصطفى خاطر، سيد رجب، بيومي فؤاد، ومن إخراج خالد دياب.