تامر حسين يوجه رسالة لعمرو دياب

كتب - محمد مجدي:

نشر الشاعر تامر حسين صورًا له على "إنستجرام"، رفقة النجم عمرو دياب، موجهًا له الشكر على إشادة الهضبة بدور حسين في ألبومه الأخير.

وكتب حسين معلقًا على الصور: "اتفاجئت وفرحت جدًا وسعدت بالتقدير الخاص من فنان كبير زيه، وأعتقد عرفتوا جميعًا ليه هو رقم ١ بالنسبالي وفي مكان وغلاوة لوحده بعيدًا عن الفرص الكبيرة اللي اتاحهالي بشٌغلى معاه ونجاحنا سوا".

وأضاف: "لازم تعرفوا الجانب الأهم والأجمل في علاقتي بالراجل ده الجدع الأصيل. ده عمرو دياب عنده ميزة نادرًا ما تلاقيها في حد تاني. كل سنة يقولي قي العلن قدام جمهوره جملة تعوضنى تعب السنة كله مع إني أساسًا شرف ليا ثقته فيا ومحبته وعلاقتنا اللي لوجه الله فقط لا غير حتى لو مانزليش معاه ولا أغنية هايفضل أستاذي وأخويا وصديق غالي جدًا على قلبي لأنه ما بينكرش أبدًا مجهود حد".

وتابع: "السنة اللي فاتت قال جٌملة بجد اتخضيت من ذوقه في حفلة مارينا، قال: (تامر حسين صاحب فضل في الألبوم ده) مع إني مهما عملت ومهما هاعمل قليل عليه وحاجات كٌلها من قلبي لخدمة الشغل ولمصلحتنا كٌلنا والسنادي فاجئنى بالشكر الخاص، كم أنت عظيم ومتواضع وحقاني ومٌخلص للناس اللي بتحبهم وبيحبوك وربنا يديم العلاقة الإنسانية والثقة اللي بينا اللي بتشرف وبتباهى بيها طول الوقت".

جدير بالذكر أن الفنان عمرو دياب طرح مؤخرًا ألبومه "كل حياتي" كاملاً عبر قناته الرسمية على "يوتيوب"، وتامر حسين أحد كتاب أغنيات الألبوم.