كلمة العدد
كل يوم و التانى نسمع عن إتفاقية حقوق الطفل وتعديلات قانون الطفل فى مصر وهكذا وهكذا...بس مين يقدر يقولى يعنى إيه حقوق الطفل؟
كل يوم و التانى نسمع عن إتفاقية حقوق الطفل، و تعديلات قانون الطفل فى مصر، و مؤتمر عن مش عارف إيه بتاع الطفل و بعد كده نشوف فى التلفزيون إعلان عن مستشفى الأطفال و بعدها مسلسل عن حماية أطفال الشوارع و هكذا وهكذا...بس مين يقدر يقولى يعنى إيه حقوق الطفل؟ إيه أصلا أهمية حقوق الطفل دى؟ طب أسئلك سؤال بسيط أوى تفتكر الواحد يعتبر طفل فى القانون لحد لما يبقى عنده كام سنة؟ يمكن كتير مننا بيفتكر إن الحاجات اللي بيبقى فيها قوانين أو اتفاقيات دولية بنبصلها علي إنها كلام كبير وكلها ناس بتضحك لبعض فى الصور وهما بيسلموا على بعض فى المؤتمرات..عارف... يمكن فى ناس كده فعلا إنما أنت فين...؟ لما أنت تعرف حقوق أخوك أو أختك و حقوقك أنت كمان الموجودة فى القانون مش ساعتها هتعرف تستفيد من حقوقك وتعرف إيه اللي ليك و إيه اللي عليك..و اتفاقية حقوق الطفل دى مش طلاسم يعنى دى إتفاقية دولية الهدف منها تحديد الحقوق الأساسية لكل طفل و إزاي نقدر نساعده على النمو سواء الجسدى أو العقلى وحمايته من أي شكل من أشكال الإيذاء أو الإهمال.
ماتيجى نبنى المستقبل لأطفالنا وبأطفالنا والموضوع مش محتاج مننا غير إنك تعرف إيه حقوقك و حقوق أخواتك و اتفاقية حقوق الطفل موجودة على صفحتنا و ببلاش ممكن جدا تنزلها و تعرف يعنى إيه طفل و إيه هى حقوقه وواجباته.
نوفمبر 2009 العالم كله هيحتفل بمرور عشرين سنة على إعلان منظمة الأمم المتحدة لاتفاقية حقوق الطفل. يا ترى والعالم كله مجتمع بيفكر فى بكره أفضل لأولاده و مستقبله هتكون بتعمل إيه ساعتها..؟ مستقبلنا فى أطفالنا حقيقة لازم نقتنع بيها علشان نقدر نستغلها ونحقق بيها أمجاد أجددنا.
محمد مجاهد