تطوع معنا
كتبت/ إيمان عادل
أحب أعرفكم بنفسي أنا بنت من قرية مصرية اسمها الأسدية تابعة لمركز أبو حماد بمحافظة الشرقية. أسمى إيمان وعايشة أجمل أيام عمري، لأني إتعلمت يعني إيه مسئولية واتعرفت على أصحاب كتير من بلدنا ومن كل محافظات مصر، كلنا هدفنا واحد وبنسأل على بعض وبنساعد بعض رغم وجود منافسة بينا لكنها منافسة هدفها تنمية بلدنا.
أنا واحدة من المتطوعين في برنامج "خطوة لمستقبلنا" وده واحد من أنشطة جمعية الشباب للسكان والتنمية اللي بتدعمها منظمة اليونيسيف.
سنة 2007 كانت بداية المرحلة الجميلة في حياتي. سافرنا للقاهرة وإنضمينا لورشة عمل في مقر جمعية الشباب للسكان والتنمية للتعريف ببرنامج" تمكين الشباب" وهو ببساطة إزاي نبقي مواطنين فاعلين تجاه مجتمعنا. إتعلمنا كمان إزاي نعمل دراسة ميدانية توضح لنا المشاكل المنتشرة في مجتمعنا الصغير.
في الدراسة الميدانية دخلت بيوت ناس كتير، منهم الغنى ومنهم الفقير وجوا قريتي اكتشفت إن بقى عندي خبرة أكبر وشوفت حاجات لمستني من جوايا وإتأثرت بيها بشكل كبير. لقيت إن الفئات الفقيرة بتحس ببعضها، عملت مقابلة مع أم وحكت لي إنها كانت بتروح تساعد ست مسنة في شغل البيت وكانت بتغطي وشها بالخمار عشان ما حدش يشوفها من الشارع لأنها كانت بتعمل ده بدون رياء وبكت وهى بتتكلم معايا لأن الست المسنة توفيت وهى ما تقدرش تروح تساعد جوزها لأنه عايش لوحده في البيت. يعنى الواحد مننا مش لازم يخرج بره بلده عشان يتعلم ويشوف حاجات جديدة، ممكن تعرف كثير لما تقرب من مجتمعك وتحسه بجد.
بعد الانتهاء من الدراسة اشتركت مع زملائي المتطوعين في ورشة عمل تانية كان هدفها تدريبنا على توظيف مواردنا لخدمة احتياجاتنا وبدأنا في إعداد أفكار مبادراتنا مع صديقنا منسق المشروع بالشرقية حسام عبد النبي .
واخترنا نبدأ بمبادرة سميناها آيـسـن،و"آيسن" كلمة لاتينية معناها ضي القمر، لأننا تخيلنا إن مشاكلنا بتمثل الظلام وحبينا نطلع منه للنور. وبدأنا بتحديد موقعنا فوضعنا لافتات كبيرة على مدخل القرية ، و99 لوحة لأسماء الله الحسنى بنظام إضاءة ليلية معلقة على أعمدة على طول مدخل القرية، وكمان بنينا السور الخارجي الموازى لمركز الشباب لتحديد حافة الترعة للوقاية من حوادث الانزلاق لأنها منطقة موقف للسيارات والتوك توك.
وحولنا مكان مهجور داخل مركز الشباب لحديقة سميناها) حديقة آيسن للأطفال( وأنشأنا نادي اجتماعي داخل مركز الشباب، وإهتمينا بقش الأرز، إتكلمنا مع الفلاحين عن خطورة حرق قش الأرز وأضراره الصحية والبيئية، واتفقنا مع الوحدة المحلية بالأسدية لتوفير الجرارات لنقل قش الأرز من الأراضي لإعادة كبسه بعد توفير مكبس يدوى.
ونظمنا قافلة طبية كبيرة مكونة من 19 عيادة متنقلة وصيدلية وفرت تخصصات مش موجودة في قريتنا زى تخصص الأمراض الجلدية والباطنة والرمد والقلب والصدر.
أجمل حاجة بعد كل اللي إتعمل إنك تحس بإن شغلك فارق وإن شخصية مشهورة زى الفنان خالد أبو النجا، سفير النوايا الحسنة لمنظمة اليونيسيف. اللي نزل قريتنا وركب التوك توك معانا علشان يشوف كل شغلنا. أخيراً إتقدرنا كمتطوعين بعد ما كانت الناس في البداية بتستخف بأي شئ نعمله.
دلوقتي لما شافوه بينا أتحسنت صورتنا في عيونهم، أهلنا كمان بقوا بيشجعونا أكتر من الأول، وعددنا كمتطوعين بيزيد بصورة كبيرة جداً حتى أصحابنا اللي عمرنا ما توقعنا مشاركتهم بقوا منتظرين أي فرصة للاشتراك معانا في الأنشطة التطوعية، الزيارة كانت بالتأكيد دفعة معنوية شجعتنا على المشاركة الإيجابية لتغيير مجتمعنا للأفضل لأننا شايفين إن مجهودنا محترم ومتقدر.
بأتمنى نوصل أفكارنا لكل الناس عشان يساعدونا ويشتركوا معانا كمتطوعين في كل المحافظات، بأتمنى عمل برنامج تليفزيوني أسبوعي أو شهري نعرض فيه المحاضرات وورش العمل وكل خطوات برنامجنا "خطوة للمستقبل" وبكده الأهالي هتعرف أولادها بيعملوا إيه وهيشجعوهم وكمان يكونوا وسيلة للمساعدة في حل مشكلات مجتمعنا.عملي التطوعي خلاني مؤمنة إن السعادة بتصنع النجاح عشان كده أنا متأكدة إن أحلامي معاكم وبيكم ممكنة.
اقرأ ايضا قصة تطوع اميرة..
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عايزين تتطوعوا؟
يهدف المركز المصري للتطوع إلى نشر ودعم الحركة التطوعية في مصر ويعمل كآلية للربط بين الشباب راغبي التطوع وخدمة مجتمعاتهم والمؤسسات التي في حاجة لمتطوعين.
يقوم المركز المصري للتطوع من خلال قاعدة بيانات الكترونية بتسجيل كافة الطلبات المقدمة من الشباب والراغبين في التطوع وعرض كل الفرص المتاحة المقدمة للمركز من الجهات والمؤسسات التي يتعاون معها المركز، ويتم ترشيح عدد من الفرص المناسبة والمتاحة للمتطوع، وكذلك الحال بالنسبة للمؤسسة في حالة الإحتياج إلى متطوعين.
ويتم ترشيح عدد من المتطوعين حسب الإحتياجات المحددة من قبل المؤسسة وتسليمهم خطاب ترشيح من المركز للمؤسسة لإستلام الفرص وبدء العمل التطوعي مع المؤسسة.
لوعاوز تتطوع من المركز المصري للتطوع، إملأ الإستمارة على الموقع
المركز المصري للتطوع تابع لجمعية الشباب للسكان والتنمية إحدى شركاء منظمة اليونيسف الرئيسيين. لمزيد من المعلومات عن الجمعية وبرامجها المختلفة
زور الموقع : www.yapd.org.eg