سؤال العدد
معظمنا بيشوف الطفل الفقير دا يعني اللي هدومة مقطعة .. و أهلة ما يقدروش يجيبولوا لعب و شيكولاتة. لكن الموضوع بالنسبة للطفل ده أكبر من كده بكتير.. يعني نقدر نقول إنه بيشوف فقره في تلات حاجات مرتبطة ببعضها:
أول حاجة أكيد في الحرمان من أي حاجة نفسه ياكلها أو يلبسها. مش بس كده، الحرمان كمان من التعليم ومن الرعاية الصحية اللازمة واللي ممكن يحرمه من الأمل في حياة أفضل.
تانى حاجة بيعاني منها هي الانعزال و دا بيبقى نتيجة مواقف كتير إتعرض لها وحس فيها بإهانة لكرامته أو مقدرش يعبر عن نفسه أو يدافع عن حقوقه.
تالت حاجة إنه بيحس إن كل العالم حواليه مش قادرين يحلوا مشاكله دلوقتي ومش حيقدروا يحلوا مشاكله اللي حاسس إنها حتحصله واللي بتهدده طول الوقت من خلال البيئة اللي عايش فيها، ورغم كده بتلاقي رد فعل أي طفل منهم أنة بيعافر بكل قوته عشان يوصل للأمان.
يعني الأطفال اللي بيعيشوا فى فقر هم الأطفال المحرومين من الموارد المادية والروحية والوجدانية اللازمة علشان يفضلوا على قيد الحياة، والنمو، والازدهار، وده بيخليهم مش قادرين يتمتعوا بحقوقهم، أو يستغلوا طاقاتهم الكاملة، أو يشاركوا كأفراد كاملين ومتساوين فى المجتمع.
ويا تري إحنا بنقدر نساعدهم ؟
أكيد...كلنا بنتعاطف مع أي طفل محتاج بنشوفه مهما كان لونه وجنسيته، ونقدر نتخيل قد إيه بيعاني طول الوقت ومحتاج وخايف، وعشان كده كلنا ما بنتأخرش في إننا نساعدهم، لكن المساعدة مهما كانت هي حل مؤقت للمشاكل اللي بيعاني منها الأطفال دول لأننا بنسد إحتياجتهم بشيء ولما يخلص.. تفضل مشكلة إحتياجتهم موجودة. إننا كناس ومجتمع بكل هيئاته نعالج مشكلة فقر الأطفال دي مش بس حاجة حلوة من الناحية الأخلاقية، دي كمان حاجة بتضمن لنا مستقبل سليم للجيل وللاستثمار في بلدنا، والأهم إن ده حقهم علينا.
طيب.. و إحنا نقدر نعمل إيه؟
إي حاجة مهما كانت بسيطة بس المهم نعملها .. ولو حتّى نبتسم في وشهم، وياريت لو حنجيب لحد فيهم هدوم مثلا مفيش مانع تبقى هدومنا اللي مش محتاجينها، بس تبقى حاجة حلوة أوى في أعيادنا مثلا.. و الاحسن إن كل أسرة فينا تجيب لفقير واحد زى أولادهم.. هدوم جديدة يفرح بيها ويحس إنها بتاعته. في بنت مغربية أنا شخصيا معجبة بيها جدا وأتمنى أعمل حاجة زي اللي هي عملتها للأطفال الفقرا اللي في منطقتها، جّمعتهم في مكان ملكها ودربتهم بإمكانيات بسيطة جدا على ألعاب مع حيوانات وعملوا سيرك صُغير،الأطفال بيخّرجوا طاقتهم وبيتعلموا مهارات نادرة بتفرحهم وبتحسسهم بالتميز والسيرك بقي مكان بيحتويهم وبيناموا فيه بأمان والعروض اللي بيعملوها بقت بتقدم ليهم دخل بيضمن لهم عيشة كريمة تخليهم يقدروا يدخلوا مدارس ويكملوا حياتهم.. حياة ناجحة سعيدة مستقرة.
لو فكرنا حنلاقي حاجات كتيرة جدا نقدر نعملها، كل حد فينا عنده حاجة يقدر يساعدهم بيها ولو حتى كانت فكرة.. بكرة يقدر ينفذها..
ودلوقتي إنتوا شايفين إيه الحاجات والأفكار اللي نقدر نساعد بيها؟
إيمــان عـادل - أسامة مبروك