سؤال العدد
استطلاع الرأى
هل ستشارك بمبادرة في بنك المبادرات؟
السؤال اللي مش بيطرح نفسه بس أنا بطرحه على نفسي وعليكم: هو الأطفال ليهم حقوق أصلاً؟ طب هي إيه؟ وعلشان إيه؟ وإزاي ياخدوها؟
السؤال اللي مش بيطرح نفسه بس أنا بطرحه على نفسي وعليكم، لإنه لو كان إتلم وطرح نفسه م الأول ما كناش لقينا كل المصايب دي هو: هو الأطفال ليهم حقوق أصلاً؟ طب هي إيه؟ وعلشان إيه؟ وإزاي ياخدوها
نبتدي بموضوع الحق نفسه: أنا قلت أشوف كده "اتفاقية حقوق الطفل" لقيت إن الحق هو احتياج أساسي مش ممكن الطفل يقدر يستغني عنه، وإذا اتحرم منه بيأثر عليه تأثير سلبي سواء علي شخصيته أو علي صحته أو حتي كرامته.
نيجي بقى للحقوق ذات نفسها: أنا لما عملت بحث على الإنترنت لقيت إن حقوق الطفل ( وسن الطفولة دوليًا من يوم لحد 18 سنة) متقسمة لخمس مجموعات:
1.مجموعة الحقوق المدنية والسياسية، زي كده إنه يبقي له اسم لما يتولد وإن من حقه إنه يحافظ علي هويته وجنسيته.
2.مجموعة حقوق البقاء والصحة، وهي كل حاجة ممكن تحافظ علي صحة الطفل زي مثلاً حقه في إنه يشرب ميه نقية ويسكن في سكن صحي ملائم ويحصل علي التطعيمات اللي تحميه من الأمراض الخطيرة.
3.مجموعة حقوق النماء والتعلم، طبعاً أنا مش هاتكلم في النقطة دي، إنتوا اللي هتقولوا نوع التعليم اللي كلنا محتاجينه علشان ينمي مهاراتنا وقدراتنا.
4.مجموعة حقوق الحماية، وهي حماية الطفل من الانفصال عن والديه وكمان حمايته من كل أشكال التمييز والإهمال والعنف والإساءة.
5.مجموعة حقوق المشاركة، وهي إن من حق كل طفل إنه يعبر عن رأيه وإنه يختار مجال دراسته ومهنته المستقبلية.
6.الخمس مجموعات دي كلها مرتبطة ببعض زي مثلاً إن الحق في اللعب مرتبط بالحق في إن الطفل ينمو في ظروف صحية ملائمة وده لأن اللعب له له تأثير إيجابي علي صحة الطفل. وكمان كل الحقوق ليها نفس الأهمية 7.وجميع الأطفال لازم يتوفر لهم الحقوق دي بدون تمييز ومش ممكن تحت أي ظرف إننا نحرم الأطفال من الحقوق دي بعد ما إديناها لهم. كمان اللأطفال لازم يكون ليهم دور في تفعيل كل الحقوق والمشاركة في نشر الوعي بيها.
تفضل أهم نقطة هو ليه الأطفال يكون ليهم حقوق أصلاً؟
خلليني أسألك كام سؤال كده:
1."هو انت اتولدت كبير كده؟ ولا كنت طفل أصلاً وبعدين كبرت؟"
2."كُنت بتتبسط لما كنت بتاخد عُلق وانت صُغير ولا كنت بتتمنى إن فيه حد يدافع عنك؟"
3."يا ترى لو كان بإيدك ترجع تاني طفل وتاخد كل الحقوق إللي أنا كلمتك عنها فوق دي، تقبل ولا لأ؟!! مع العلم طبعًا إن ده لو حصل ما كنتش هتبقى نفس الإنسان إللي قاعد دلوقتي واحتمال كبير كنت هتبقى أحسن من دلوقتي؟!! ولا انت إيه رأيك؟!!"
4."يا ترى كام طفل ساب البيت بسبب سوء معاملة الأب أو الأم أو الاتنين وبقى طفل من أطفال الشوارع؟"
5."يا ترى كام طفل لسه محروم من فرصة تعليم، وكام طفل بيضطر يشثغل بدل ما يروح المدرسة؟
6.يا تري كام طفل محروم من رعاية صحية جيدة وبيئة نظيفة يعيش فيها؟
7.يا تري كام طفل عنده فرصة يقول رأيه ويشارك بجد في نطاق أسرته أو مدرسته أو المجتمع كله؟
8."يا ترى فيه كام أب وأم أصلاً في الجيل الجديد ولا القديم حتى فاهمين يعني إيه تربية الأطفال على حق مش واخدينها بالتجربة والخطأ لحد ما يضيعوا العيال؟"
فاضل سؤال أخير، هو إزاي الطفل يقدر ياخد حقه؟
أولاً هو لازم يعرف حقه وده بيكون عن طريق الحكومات ووسائل الإعلام والمنظمات الغير حكومية.
ثانياً لازم يحافظ علي حقوقه ويعرف إن كل حق من الحقوق اللي هو واخدها دي بيحمله مسؤولية؛ زي الحق في التعبير بتقابله مسؤولية أمانة الكلمة واني ما أقولش حاجات مش صحيحة، وحقه في التعليم بيحمله مسؤولية المذاكرة،
وحقه في الرعاية الصحية بيفرض عليه مسؤولية الحفاظ علي البيئة.
ثالثاً كل طفل لازم يشارك في إعطاء باقي الأطفال حقوقهم سواء بالمشاركة في تعريف الأطفال دول بحقوقهم أو بمساعدتهم في الحصول عليها كل الوسائل الممكنة.
أنا مش هطول عليك أكتر من كده... أنا كان عندي كام كلمة حبيت أقولهم عشان أخلص ضميري من ربنا...
بس خليني أسألك سؤال أخير "يا ترى إنت بتعامل أي طفل تعرفه بصورة ترضي ضميرك وترضي ربنا؟!!
شيماء بكر