سؤال العدد
هل هى الدافع الرئيسى للشعور بالقوة أو الضعف؟ ..وإزاى أقدر أحدد ثقتى بنفسى؟
بصراحة أنا شايف وبأمانة تامة إن العاملين الرئيسيين والمؤثرين جداً فى تكوين شخصية قوية هما الصراحة والصدق فى تحديد المزايا والعيوب اللى على أساسها بيتم تقدير النفس، واللى بتعتبر سبب من الأسباب اللى بتحدد فيها ثقتك بنفسك ...بشرط الصدق مع النفس ومحاولة الإستفادة من الأخطاء والسعى فى إصلاحها ...
زى الإنسان اللى حاسس بنقص فى تكوينه الشخصى، عنده كل الصلاحيات عشان يكون طبيب ناجح، مثلاً، ولكن ثقته فى نفسه مهزوزة، يملك المهارة العلمية ولكن ينقصه الابتسامة فى وجه مرضاه... اللى هيَّ أساس التعامل والقبول بين الناس...
يعنى تقدر تقول إن تحديد إمكانياتى ومميزاتى وعيوبى بيوفر فرصة أكيدة فى تحديد ثقتك بنفسك... دلوقتى لو إنت حاسس إنك بتمتلك -فعلاً- سلاح اسمه الثقة بالنفس ....
إزاى بقى تقدر تُجيد استخدامه فى معارك الحياة المختلفة ؟
تقدر ببعض الأسرار الخاصة اللى من الممكن إنها تكون سبب فى تكوين شخصية واثقة بنفسها كويس أوى .... زى العلاج لضعيف الشخصية والغير واثق بنفسه ..
صدقنى لازم تتأكد إن إحساسك (الحقيقى) بنفسك بيظهر للآخرين من خلال تصرفاتك وكلماتك وتعابير وجهك ..
والإيمان الشديد بأن مفتاح الثقة بالنفس هو الاعتراف بأن كل واحد منِّا عنده عيوب ممكن تكون ظاهرة وممكن تكون عيوب خفية ...الأهم من كده عدم تجاهلها ومحاولة التخلص منها تدريجياً..
تعرف إن الفشل فى جانب من جوانب الحياة ممكن يكون سبب فى الإصابة بالعجز المكتسب ...برده زى النجاح مهما كان ضئيل بيقود صاحبه إلى الشعور بالقدرة على الاستمرارية فى النجاح ..
بس أنا حاسس إن فشل بعض الأشخاص بيكون بسبب (السلبية) وعدم الرغبة في مواجهة عيوبنا واكتشاف مزايانا؛ وبصراحة علاج السلبية دي هوَّ الطريق الوحيد لـ (استعادة الثقة بالنفس)...
معنى كده إن لو عندك موهبة أو نشاط مميز فى أى مجال من مواقف الحياة المختلفة حاول استثمارها بكل الطرق المتاحة..
وتعرف بقى أكيد لوعايز تكون واثق جداً بنفسك ؛ العب دور (المؤثر ) فى الأحداث ، ما تكتفيش بدور (المُتأثر) و(المتضرر).
الأجمل فى اكتساب الثقة الكافية اللى بتنتج عن تقدير النفس كويس ؛ إنك مش لازم تقلل من قدر نفسك أمام الآخرين، أوصف نفسك بصراحة وبكل موضوعية، بشرط لو واجهتك أى مشكلة لا تلجأ للانهيار السريع ... ولا تطلب (الإحباط ) ليكون بجوارك فى مشكلتك .
أرجوك ابعد تماما ًعن لوم نفسك عند مواجهة أى مشكلة؛ لأن كتير جداً بتكون في مشاكل أسبابها خارجة عن إرادتك ....
وصدقنى لو واجهتك أى مشكلة التفكير فى الحل العملى أسهل طريق لراحة البال وتضييع الوقت فى التفكير الممل اللى مالوش فايدة ..
نسيت أقولك حاول بقدر المستطاع أن تُحب نفسك وخليك واثق تماماً فى إنك تستحق التقدير وثقة الآخرين فيك .....
ما تخليش نفسك تسمع كلمة ( أنا فاشل )، ( أنا مش عارف)، (مستحيل ) .
الكلام ده هَّو اللى بيدمر الثقة اللى بتحاول تبنيها فى نفسك وتحب تشوف أثرها مع الناس ....
وخللى نفسك تسمع (إنك قادر تتغلَّب على المشكلة )، (إن مفيش حاجة اسمها مش عارف )، ( إنك هتقاتل نفسك عشان متكررش نفس الأخطاء)...
أنا شايف فعلاً إن الثقة بالنفس دافع رئيسى للشعور بالقوة أو الضعف ..
قولى بقى إنت شايف ثقتك بنفسك بتبنيها على أى أساس ؟!
إيهاب عبد الباسط