المرور

اصحى من النوم أصلى و افطر و احضر نفسى و البس عشان اروح الشغل كل ده فى مدة ما تزيدش عن ساعة وآجى بعد كده للمشكلة الكبرى ألا وهى هاروح الشغل إزاى؟ وفى أد أيه ؟

هى المشكلة أنى ساكنة فى الموقع ده (الهرم) ولا لأنى ساكنة فى مصر ولا إية المشكلة ؟

الطريق ممكن يأخذ منى حوالى ساعة ونصف على الأقل مع أن المسافة من البيت للعمل مش طويلة بس المشكلة فى الزحمة وعدم وجود تنظيم للمرور فى المكان ده أو حتى فى مصر بشكل عام وخصوصا فى وقت الذهاب للعمل والمدارس والجامعات صباحا وكمان وقت العودة. وفى جريدة الدستور سؤال معبَر يوضح مدى التأثير الكبير للازدحام على حياة المصريين:

"بماذا ستجيب كمصرى عند سؤالك عن عمرك فيما أفنيته بعد عمر طويل؟ وكانت الإجابة فى إشارة قصر النيل مستنيها تفتح، فى صلاح سالم مستنية يتحرك، وعلى كوبرى أكتوبر مستنى لما رئيس الوزراء يروح" .

سبب المشكلة دي بيرجع لأسباب كثيرة وأهمها الهجرة الداخلية التى تعود إلى عدم الاهتمام بالقرى وعدم توفير فرص عمل للشباب  فبالتالى يترك هؤلاء الافراد مساكنهم ويقيموا بالعاصمة مما أدى إلى التكدس فى القاهرة. بالإضافة إلى أن أصلا الجزء الأكبر من سكان مصر يتركز فى الوادى و الدلتا. وكمان عدم تطوير البنية الأساسية التى تشتمل على وسائل المواصلات.

مشكلة المرور أدت إلى سلوكيات كثيرة غير محمودة منها : 

استغلال أصحاب وسائل المواصلات من (تاكسى، ميكروباص، مينى باص...) فبالنسبة لسائق التاكسى فى الصباح بيكون مركب معاه فى الكنبة اللى فى الخلف ناس وقبل ما يسمح لك تركب جنبه يسألك هتدفع كام؟ ولو ما عجبوش المبلغ يمشى ويسيبك ولو حتى مش مركب طول الطريق عامل التاكسى ميكروباص. أما بالنسبة للميكروباص فده عالم ثانى خالص، بيعملوا إيه؟ بيقسموا الطريق يعنى إيه؟ يعنى وأنت بتركب ما تقولوش أنت رايح فين بالظبط لحسن يزعل ويمشى ويسيبك، تقول له مكان قريب من اللى انت بتركب منه بحيث لما يجى المكان دة ويقول اللى نازل تقولوا هكمل يقولك أجرة تانى يا نجم  وهكذا بحيث لما توصل للمكان اللى انت عايزه تكون دفعت أجرة 3 أو 4 مرات. ما تستغربوش هى دي الحقيقة، ده غير بقى السائق اللى بيركب على مزاجة اللى يعجبه يركبه واللى مش مستلطفه يقول له مش رايح .

أنا كنت متخيلة بعد قانون المرور الجديد أن الناس هتصبح أكثر التزاما لكن للأسف محصلش و من الواضح أن خيالى راح لبعيد . طيب فى مين العيب ؟على رأى المتنبى :

نعيب زمننا والعيب فينا             ومالزمننا عيب سوانا

من وجهة نظرى، أن المرور مسئولية كل الناس: اللى ماشى على رجله اللى سايق اللى بيطبق القانون اللى بيقوم بوضع القانون. يعنى برضه مانقدرش نقول أن الحكومة بس هى المسئولة عن تدهور المرور، لكن عشان نبقى بنتكلم بجد صح الناس محتاجة تغير عاداتها السيئة وأساليبها فى طرق التعامل مع الأخرين، محتاجين لما نشوف شخص غير قادر أو مسن نقف له ونساعده، وكمان لما الإشارة تبقى حمراء نقف حتى ولو مفيش عسكرى يدون المخالفات، محتاجين كمان قانون يتماشى مع فكر المصريين ولسه محتاجين محتاجين محتاجين حاجات كتيرة .  

عزة إبراهيم

الإصدارات السابقة