أخبار تم حفظها
أخبار النهاردة

مصراوي يجري أول حوار مع أدمن صفحة ''أساحبي''

مصراوي يجري أول حوار مع أدمن صفحة ''أساحبي''

حسام ومحمد اصحاب فكرة اساحبى

6/13/2012 4:42:00 PM

حوار - هند بشندي:
 
"أساحبي" "اسديكي" "ازميلي".. لغة شخصية "عاتشف" التي بدأت من على صفحات الفيس بوك.. وانتشرت بين صفحات عالم الإنترنت.. حتي وصلت إلى الشارع المصري في فترة لما تتجاوز عدة شهور قليلة منذ أن انشئت الصفحة في 7 أبريل 2012..
 
اذا بحثت عن كلمة "أساحبي" على موقع الفيس بوك ستجد مئات النتائج عن صفحات تحمل نفس الاسم.. وان صاحبها في أحيان بعض التغيرات "اساحبي..رئيسا للجمهورية".. "اساحبي ..اساحبتي".. لكن أصحاب الفكرة وأول صفحة انشأت بهذا الاسم هما "حسام حامد.. ومحمد عبد المنعم" ولاد العم.. طلاب احدي الجامعات الخاصة.. التي كانت تعليقاتهم عبارة عن هزار وألش انتقلت على الفيس بوك من خلال "عاتشف"..
 
مصراوي قام باجراء اول حوار مع ادمن صفحة "أساحبي" الأصلية.. حسام ومحمد اللذان يعتبران نفسيهما "واحد"..

 

في البداية ازاي جتلكم فكرة "أساحبي" وشخصية "عاتشف"؟


أساحبي كان صورة أو شكل معين من موقع يسمي "مجتمع مصر الساخر" بدأنا اننا ناخد الشخصية دي نخليها مستقله شوية, لأنها كانت رمز فقط في الموقع هناك.
 

ايه هدفكم من الصفحة؟


فكرة الصفحة, اننا ندخل المجتمع الشعبى, اللى ملوش في الإنترنت ولا اى حاجه, ندخل اللغة بتاعته ولهجته وشعبيته داخل عالم الإنترنت.
 
وفكرة الصفحة بتقوم على الواقع اللى احنا فيه, بمعني اننا بنشوف ايه اللى بيحصل حوالينا, من مواقف فى البيت مع الأم والأب وطريقة المعاملة والأخوات, ونبدأ نرصدها, ونعملها على شكل كوميكس, هنا بنلاقى اقبال كتير جدا ان الموقف ده بيحصل معاهم فعلا.
 
وبنراقب الأحداث السياسية والاجتماعية وكل حاجه, ونبدأ في التعامل معاها على أساس الكوميديا الساخرة.
 

الصفحة تتناول كوميديا سياسية.. ايه الهدف السياسي من الصفحة؟


الهدف من الرسالة السياسية, ان الناس تفهم اللى بيحصل حواليها, مش عاوزة تتفرج على تليفزيون أو برنامج سياسي, احنا بنحاول نوصلهم بطريقة الكوميكس الساخرة دي ببساطة خالص.
 

محمد وحسام قرروا دعم محمد مرسي في الانتخابات.. فهل استخدمتم الصفحة للترويج لمرسي؟


وهنا اختلفت الإجابة فيرد حسام على فكرة أنا كنت من حملة ابو الفتوح، بينما يقول محمد أنه كان يدعم صباحي.
 
لكنهما عادا فاتفقا في الإعادة على انتخاب مرسي.
 
وقالوا:لازم نكون ديما واقفين ضد الفلول, احنا معملناش ثورة علشان نجيب النظام من تانى، والصفحة مش لدعم مرسي, الصفحة ماشية سياسيا حاليا لنجاح الثورة وعدم انتخاب شفيق، فــ مش بنقول انتخبوا مرسي, احنا بنقول نقف ضد شفيق في اللى هينتخب وفى اللى هيقاطع.
 

أساحبي وازميلي.. لغة جديدة.. جتلكم فكرتها منين؟


لا دى اصلا موجوده في الشارع والعشوائيات وزي ما قولنا اننا حبينا بس ندخلها عالم الإنترنت عن طريق الكوميكس.
 

طريقة كلام عاتشف اثرت على طريقتكم في التعامل مع الناس؟


فعلا اثرت علينا جدا, لدرجة ان كنا بنادى أصحابنا بيها, أساحبي وأساحبتي!

امتي اكتشفتم نجاحكم.. والانتشار الرهيب لطريقة "عاتشف" في الكلام؟


لما عملنا الصفحة بدأت في أول أسبوع تنتشر جدا، ونزلنا الجامعة لقينا في ناس بتتكلم كده ! أساحبي واساديكي ! وبيضحكوا وبعد شهر من الصفحة وصلت لـ 180 ألف فانز. كنا راكبين الميكروباص, وفعلا لقينا ناس بيتكلموا كده، وقتها اكتشفنا أنها انتشرت في وقت قليل جدا جدا وسط الناس.

وده كنتم متوقعينه؟


لا متوقعناش ابدا ان الصفحة تنجح كده وان ناس كتير تقلدنا وتعمل صفحات تانية كتير بعدنا بنفس الاسم.
 

ومن وجهة نظركم ايه سر نجاح الصفحة؟


نجاح الصفحة كان بسبب أنها عملية إنتاج فكر جديد في وسط الفيس بوك عموما.

؟h3>هل بيضايقكم كمية الصفحات اللي اقتبست منكم فكرة "أساحبي" وهل فكرتم في اثبات حقكم في الفكرة
طبعا ضايقنا جدا, بس بنقول الحمد لله ان فى ناس كتير عارفه ان احنا أصحاب الصفحة الرسمية وأصاحب فكرة عمل الصفحة من الأول، في ناس كتير متعرفش, بس بنقول يارب بقى.
 
h3>"حسام" طالب في إعلام وبيكتب سيناريوهات..فهل فكرتم في استغلال الفكره.. خصوصا سينمائياً؟
وهنا يرد حسام: بالفعل انا بحب الكتابه جدا, وفعلا كنت بكتب للشخصية دى مسلسل كارتون وعلى وشك الانتهاء من كتابته ان شاء الله.
 
والاستغلال سينمائياً بقى فانا اتمنى طبعا يحصل, بس لسه شوية!
 

ومين انسب من يؤدي شخصية "عاتشف" في السينما؟


انسب حد, عمرو واكد.
 

ايه اهم النقد اللي واجهكم؟


يخربيتكم أساحبي هتبوظ اللغة العربية!
 
وننتقل للحديث مع "عاتشف"
 

"عاتشف" انت ثورجي؟


ثورجي حتي النوخاع

هتنتخب مين؟


نا أضد الفلول أمادمازيل, يعني هنتخب مووورسي أكيد أساحبتي.
 

تقول ايه عن مبارك؟


رجل نشأ في فساد الأرض, فخربها خالص خالص يعني!
 

المجلس العسكري


شئ من الخراب والفساد ظهر جديد بعد الثورة

شفيق


حد كده مش فاهم نفسه اصلا . ده لو اتفرج على نفسه فى التليفزيون, هيروح ينتخب مرسي!
 

الإخوان


انتوا ناس حلوة والله, بس وحياة أبوكو الثورة مش ليكو انتوا بس دى لينا كليتنا, فوقوا وخليكوا معانا ايد فى ايد بقى أزميلي.

 

اقرأ ايضا :

أخبار مصراوي بوابتك إلى أخبار مصر و الشرق الأوسط و العالم مع ...

الكلمات البحثية:

الفيس بوك | الكوميديا الساخرة | المجلس العسكري | محمد مرسي | الانتخابات | |

ردود زوار مصراوي على الخبر

اضف تعليق
من أجل عالم أفضل