مي كساب: غادة عبدالرازق من "أجدع" شخصيات الوسط الفني وموهبة عظيمة

كتبت- منى الموجي:

حرصت الفنانة مي كساب على التضامن مع الفنانة غادة عبدالرازق، وشاركت جمهور صفحتها الرسمية على موقع "انستجرام" رأيها في غادة، التي تعاونت معها في فيلم "بون سواريه" قبل أعوام.

وأكدت مي أن ما ستقوله شهادة حق واجبة عليها، متابعة "أنا عمري في حياتي ما بقول غير الحق، ابويا رباني علي كده ودي شهادة حق وواجب عليا لازم أعمله. أنا بقالي ١٧ سنة بشتغل في المهنة دي مثلت تقريبا مع كل الوسط الفني، غادة عبدالرازق من أجدع وانضف الشخصيات اللي ممكن تشتغل معاها، ست جدعة وأم حنينة جدا لبنتها الطيارة المحترمة روتانا قزاز"، لافتة إلى أنها تعاونت معها في فيلم، وطوال فترة العمل وجدتها "حنينة"، "طيبة" و"جدعة" معها ومع كل الفريق، وتحترم الصغير قبل الكبير.

وأضافت مي "فوق كل ده طبعا دي موهبة عظيمة وكبيرة، أستاذة، وأنا شاهدة إنها مش بتعرف تنام غير لما تاخد دوا فعلا وناس كتير عارفه تأثير الدوا المهدئ ده ايه"، ووجهت رسالة لغادة قالت فيها "اعتذارك حاجة كبيرة ومحترمة منك ودموعك غالية جدا متضايقيش نفسك ربنا غفور رحيم، وهو أرحم من البشر بكتير وكل إنسان بيفهم ويري بعينه، وأنا عن نفسي صدقتك وفخورة بيكي ربنا يخليكي لبنتك وأحفادك وكل اللي بيحبوكي".

وانتقدت مي هجوم البعض على غادة، بالصورة التي جعلتها تصل لهذه الحالة، مضيفة "أنا مش عارفة ليه نوصل إنسان انه يبكي بالشكل ده قدام ناس كتير ويبان مكسور كده من الفضيحة، بغض النظر عن رأيي في اللي حصل ومن غير ما نحاسب ونحرم ونكفر، دي ممثلة قعدت سنين كتيير تقدم أعمال حلوة وناس كتير حبتها حتي لو انت مش منهم، اه ممكن نعترض علي الغلط بس مش بغلط أكبر، ممكن ننصح بس مش في العلن".

يُذكر أن الفنانة غادة عبدالرازق أطلت مساء أمس على جمهورها، من خلال فيديو مباشر، أوضحت فيه حقيقة ما حدث معها في الفيديو المثير للجدل، واعتذرت فيه لجمهورها ولابنتها روتانا، مؤكدة أن ما حدث خطأ غير مقصود، لأنها ليست في حاجة للقيام بمثل هذه الأفعال، مشددة على أن الخطأ لن يتكرر.