مي كساب: أدفع ثمن تربيتي وحساسيتي الزائدة
كتبت- منى الموجي:
نشرت الفنانة مي كساب عبر صفحتها الرسمية على موقع "انستجرام" رسالة جديدة، شاركت فيها متابعيها ما تعانيه منذ ست سنوات، خاصة بعد القبض على زوجها "مغني المهرجانات" محمد صلاح الشهير بـ"أوكا".
وكتبت مي "نفسي تعبانة قوي بقالها ٦سنين مصدومة ومحتارة ومش عارفة ترسى على بر.. مش عارفي تلاقي راحة البال ولا السعادة ولا الرضا.. بتدفع تمن إنها حساسة زيادة عن اللزوم.. بتدفع تمن التربية والأصول.. من يوم ما الثورة قامت وأنا مش أنا كبرت وعجزت وصغرت وعيلت وشيبت.. مش فاهمة حاجة تايهة توهة وحشة قوي مش عارفة ألاقيني خالص".
وتابعت مي "والله العظيم مش لاقية مي خالص.. أنا مش انا.. ابتلاءات كتير والحمد لله صدمات في البشر أكتر والحمد لله.. حتى الشغل حاسة فيه بكبوة كبيرة جدا استنزاف واستهلاك مش طبيعي.. وبرضه مش باستسلم بقوي نفسي وأقولها قومي ما تفقديش الأمل في رحمة ربنا ما تفقديش الأمل في بكره أحلى ما تفقديش الأمل في المدينة الفاضلة ما تفقديش الأمل في انك تلاقي مي من جديد.. بس للأسف النفاق والوشوش الكذابة اللي شفتها وقت الثورة صدمتني قوي.. موت أمي كسرني قوي تدخل الناس في حياتي وتعليقاتهم الغير مهذبة واجعني قوي.. استنزافي في الشغل واستهلاكي وإحساسي أني مش عارفة أقدم الفن اللي نفسي أقدمه دابحني قوي..
أزمة جوزي قتلاني قوي، عارفة إن ده أصعب اختبار من رب العالمين ونفسي أكون أده بحاول أكون أده بس تراكمات السنين مبهدلاني قوي.. حاسة إن نفسي محتاجة إعادة هيكلة زي كل حاجة في بلدنا يارب خرجنا من المحنة الكبيرة دي.. محمد كان بيديني طاقة أمل كان بيصبرني ودايما يقولي اللي جاي أحلى هتتولدي من جديد.. ربنا يرجعك انت وأحمد بالسلامة عشان بجد نفسي أتولد من جديد وأفقد الذاكرة وانسى وجع وتعب السنين دول بس ما انساش اللي اتعلمته منهم.. أنا في انتظار رحمة وعدل ربنا في انتظار نفسي في انتظار موعدي مع السعادة".
يُذكر أن أوكا وأورتيجا أُلقي القبض عليهما في مطار القاهرة، قبل سفرهما إلى الإمارات لإحياء حفلات غنائية، ووجهت لهما تهمة تزوير قيد عائلي للتهرب من التجنيد، وتم تحويلهما إلى النيابة العسكرية.
فيديو قد يعجبك:
