أبو حفيظة يوضح حقيقة أزمة ''بلاد طيبة''.. ورد فعل ''الكينج'' بعد سماعه الأغنية (صور وفيديو)

كتب – محمد مكاوي:

نفى المذيع أكرم حسني، مقدم برنامج ''أسعد الله مساءكم من جديد''، تعديه على حقوق الملكية الفكرية لأغنية ''بلاد طيبة'' للفنان محمد منير والفنانة أنوشكا، وتأليف وتلحين مدحت الخولي.

وقال حسني، عبر حسابه على فيسبوك، الأربعاء، أنه ''على الرغم من أن في ألف حاجة أهم من الموضوع اللي هاتكلم فيه لأن ظروف البلد مش ناقصة ولكن من حقي أرد على ادعاءات بدأت تنتشر اليومين اللي فاتوا عن أني تعديت علي حقوق الملكية الفكرية للأستاذ المحترم ‏مدحت الخولي مؤلف وملحن اغنية ''بلاد طيبة'' للكينج محمد منير والفنانة الكبيرة أنوشكا وأني استخدمت لحنها في برنامج'' أسعد الله مساءكم من جديد'' بدون ما أخد تصريح بده''.

وأوضح مبتكر شخصي ''أبو حفيظة''، ''أنا عمري ما تعديت على حق أو مجهود أي فنان أو مبدع لأني عارف كويس أوي يعني ايه حد يتعب ويلاقي حد جه أخد مجهوده على الجاهز ونسبه لنفسه وبالتالي قبل ما استخدم لحن الأغنية تقدمت بطلب لجمعية المؤلفين والملحنين بتاريخ الثامن من أكتوبر الجاري لاستخدام اللحن وتم التصريح ليا باستخدامه'' – نشر حسني مستندات التصريح عبر صفحته.

وأضاف ''بعد ما عرفت أن الاستاذ مدحت عاوز يأخد إجراء قانوني حاولت الاتصال بيه علشان أوضح له الموقف بس هو للأسف ماردش عليا ف بعت له رسالة و قولتله انا اكرم حسني و بحاول اكلمك و لكنه للأسف بردو ماردش عليا''.

وتابع حسني ''الإجراء اللي انا بأعمله ده مش وليد النهاردة لاني باقدم برامجى في التليفزيون من اكتر من خمس سنين وهتلاقوا صورة مع البوست ده بتوضح أني باعمل ده من سنة 2010 لحفظ حقوق المبدعين أصحاب الحقوق''.

وقال أبو حفيظة إن ''وده أهم ما يعنيني في الموضوع بعد اتخاذي كافة الاجراءات الرسمية هو اتصال الكينج الفنان الحقيقي اسما وحجما محمد منير بيا.. فوجئت بيه بيكلمني في التليفون و بيقوللي يا اكرم أنا باحييك على الاغنية وأنا اتبسطت بيها جدا وضحكت من قلبي وأنا باتفرج عليها وأوعي تلفت لاي حد عايز يحبطك وخليك مركز في شغلك وبس .. و ده إن دل على حاجة ف بيدل على احترام هذا الفنان وان حجمه الفني و تاريخه دول ماجوش من فراغ'' وأختتم أكرم حسني تصريحاته بتوجيه التحية للفنان محمد منير، قائلا: ''تحية من كل قلبي للكينج لتواضعه وحبه للناس ''.

لمشاهدة الفيديو..اضغط هنا

لمتابعة أهم وأحدث الأخبار اشترك الآن في خدمة مصراوي للرسائل القصيرة للاشتراك ...اضغط هنا